Бүгінде ел арасында Жамбыл өңірінде, оның ішінде Тараз қаласында халықтың мәдени тынығатын орындары аз екені жиі айтылады. Мұны бұқараның мәдени шаралардың өтетін орындарынан жеткілікті түрде ақпарат ала алмайтындығының әсерінен деп түсіндік. Осы олқылықтың орнын толтыру мақсатында қалың оқырманның назарына Жамбыл облысы әкімдігінің мәдениет, архивтер және құжаттама басқармасына қарасты мекемелерде өтетін шаралардың аңдатпасын ұсынамыз. Алдағы сейсенбі, 6-ақпан күні Облыстық қазақ драма театрының үлкен залында «Томирис» тарихи драмасы сахналанады. Ғұндардың ғұрпын көз алдыңызға әкеліп, ғасырлар қойнауына сапар шектірер қойылымда сіздер қайсар жүректің иесі Тұмар ханшайымның ерліктеріне куә боласыздар. 7-ақпан күні дәл осы залда бүгінгі қоғамның күре тамырына аш кенеше жабысқан жемқорлық жайында «Аса мәртебелі, СЕЙФ» атты драмасы қойылады. 6-ақпан күні Жамбыл политехникалық колледжінде Облыстық кино орталығының ұйымдастыруымен студенттер назарына «Тығырықтан жол тапқан» көркем фильмі ұсынылады. 7-ақпанда №51 мектеп оқушыларына «Қазақ елім» көркем фильмі көрсетіледі. Балаларыңыздың бос уақыты мағыналы өткенін қаласаңыз 8-ақпан күні қазақ драма театрына «Алтын мүйізді киік» ертегісін тамашалауға келіңіз. Ал, 10-ақпан күні «Баласағұн» орталық концерт залында белгілі блогер Өркен Кенжебек, PR маманы Әлішер Елікбаев, тележүргізуші Динара Сатжан, сарапшы Саясат Нұрбек, танымал ресторатор Қуаныш Шонбайдың қатысуымен үлкен «Level up 2018» бизнес форумы өтеді. Ақылы түрде өтетін бизнес форумның билеттерін «Astana Park» кинотеатрының кассасынан ала аласыздар. Ал, осы ғимаратта Жамбыл облыстық филармониясының ұйымдастыруымен 16-ақпан күні Нұрғиса Тілендиевтің шығармашылығына арналған «Өз елім» атты Эстрадалық танымдық-лекциялық концерт өтеді.
Мәдениет ошақтарында өтетін сан түрлі шаралардан құр қалмай, рухани азық алудан шаршамаңыздар.
TURANINFO.KZ
