«Самұрық-Қазына» жалғыз акционерінің 2025 жылғы 12 сәуірдегі шешімімен Қанат Шарлапаев қоғамның директорлар кеңесінің мүшесі болып сайланды.
Енгізілген өзгерісті ескере отырып, «Самұрық-Қазына» директорлар кеңесі жеті адамнан тұрады:
- Олжас Бектенов — кеңес төрағасы, премьер-министр;
- Қанат Шарлапаев — директорлар кеңесінің мүшесі, Президенттің көмекшісі;
- Вонг Хэн Файн – «Самұрық-Қазына» тәуелсіз директоры;
- Нұрлан Жақыпов – «Самұрық-Қазына» басқармасының төрағасы;
- Болат Жәмішев — «Самұрық-Қазына» тәуелсіз директоры;
- Лука Сутера — «Самұрық-Қазына» тәуелсіз директоры;
- Мұхаммед Жамил Әл Рамахи — «Самұрық-Қазына» тәуелсіз директоры.
Қанат Шарлапаев туралы не белгілі?
1981 жылы Ресей Федерациясында туған. Саратов әлеуметтік-экономикалық университетін, Крэнфилд менеджмент мектебін (Ұлыбритания) бітірген. Мамандығы бойынша экономист, қаржы және басқару магистрі.
- Еңбек жолын 2003 жылы Ресей Федерациясының Петрокоммерц банкінің Клиенттерді басқару басқармасының менеджері болып бастаған.
- 2006-2008 жылдары «Сити» инвестициялық банкінің Лондон (Ұлыбритания), Прага қалаларындағы (Чехия) Қаржы департаментінде маман болып жұмыс істеген.
- 2008-2014 жылдары «Сити» инвестициялық банкінің (Ұлыбритания) нарықтағы акциялар жұмысы жөніндегі өңірлік дивизионының аға талдаушысы, вице-президентінің көмекшісі, вице-президенті болған.
- 2014-2015 жылдар аралығында Ұлыбританияның «Сити» инвестициялық банкінің Еуропа, Таяу Шығыс және Африка бойынша Стратегиялық жоспарлау және талдау өңірлік тобының вице-президенті лауазымын атқарған.
- 2015-2017 жылдары Қазақстанның Сити банкінде бас қаржы директоры, басқарма төрағасының орынбасары, аға вице-президенті болған.
- 2017-2020 жылдар аралығында Ресей Федерациясының «Сити» инвестициялық банкінің Ресей, Украина және Қазақстан бойынша бас қаржы директоры, аға вице-президенті болып жұмыс істеген.
- 2020 жылы «Сити» инвестициялық банкінің (БАӘ) Африка, Таяу Шығыс пен Шығыс Еуропаның дамушы нарықтарындағы стратегия, жоспарлау және талдау жөніндегі өңірлік директоры лауазымына тағайындалған.
- 2022 жылғы ақпаннан бастап «Бәйтерек» ұлттық басқарушы холдингі» акционерлік қоғамының басқарма төрағасы қызметін атқарған.
- 2023 жылғы 4 қыркүйектен бастап Қазақстан Республикасы өнеркәсіп және құрылыс министрі болып тағайындалды.
2025 жылы 28 ақпанда Қанат ШарлапаевПрезиденттің экономикалық мәселелер жөніндегі көмекшісі болып тағайындалды.
