Мемлекет басшысының тапсырмасын орындау мақсатында «Ашық сағат алаңында» Индустрия және инфрақұрылымдық даму министрі Қайырбек Өскенбаевтың басшылығымен кеңес өткізіліп, онда еліміздегі мұнай-газ саласындағы машина құрастыруды оқшаулау мәселелері қаралды.
Мониторинг деректері бойынша 2021 жылы ірі операторлар машина шығару бағытында 144,7 млрд теңге сомасына тауарлар сатып алған. Бұл ретте ішкі үлес 5,5%-ға (немесе 7,9 млрд теңге) жеткен. Қайырбек Өскенбаевтың айтуынша, бұл жер қойнауын пайдаланушылардың сатып алуларында импортты алмастыруда дайын өнім өндірудің зор мүмкіндігін айғақтайды.
Кеңесте алдымен Халықаралық мұнай-газ саласындағы машина шығару орталығының (IMBC) бас директоры Марат Кәрімовтың есебі тыңдалды. Ол тұтынудағы импорттық және отандық өнімдердің үлесін айта келе өндірістік процесті оқшаулау жөнінде орталықтың жүргізіп жатқан жұмысы туралы жеткізді. Бұл орталық ірі мұнай операторлары мен отандық нарықтың қажеттіліктеріне талдау жүргізу, сонымен бірге адвокатура және инвестициялар тарту бағытындағы жұмыстарды іске асырған.
Өз кезегінде Индустриялық даму комитетінің төрағасы Ілияс Оспанов сертификаттау шығындарын өтеуге байланысты өнеркәсіпті ынталандыру шаралары туралы айтып берді.
Сондай-ақ кеңесте машина шығару саласындағы кәсіпорындар мен бизнес өкілдері өз пікірлерін жеткізді. Осы арқылы ірі мұнай өндіруші компаниялармен арадағы байланыстың нашар екені анықталды.
Министр кеңесті қорытындылай келе анықталған проблемаларды жан-жақты қарастыруды тапсырып, осы жұмысқа импортты алмастыруға қауқары жеткілікті отандық өндірушілерді тартудың маңыздылығын айтты.
