Мемлекет басшысының әлеуметтік инфрақұрылымды дамыту жөніндегі тапсырмаларын орындау аясында елімізде заңсыз иемденілген активтерді қайтару есебінен әлеуметтік нысандардың құрылысы қарқынды жүргізіліп жатыр.
Қостанай облысы тұрғындарын сапалы ауызсумен қамтамасыз ету мақсатында Арнаулы мемлекеттік қордан шамамен 5,4 млрд теңге қаржы бөлінді.
«Бүгінде Тобыл қаласында халықтың 87,9%-ы орталықтандырылған су жүйесіне қосылған. Бұл көрсеткішті 100%-ға жеткізу үшін қалада ұзындығы 100 шақырымнан асатын су құбыры желілерінің құрылысы басталды. Бұл мақсатқа қордан 1,4 млрд теңге бөлінді. Сондай-ақ, Арқалық қаласына су құбырын тартуға 872 млн теңге бөлінді. Жоба 13 мыңнан аса тұрғыны бар қаланы ауызсумен толық қамтамасыз етіп, 2025 жылдың соңына дейін сумен қамту деңгейін 96,5%-дан 100%-ға жеткізуге мүмкіндік береді», — деп жазылған хабарламада.
Сонымен қатар, Қарабалық, Денисов, Қостанай, Федоров, Бейімбет Майлин аудандары ауылдарында, Арқалық қаласындағы Жастар ауылында жалпы құны 3 млрд теңгеден асатын су құбыры желілерін тарту жоспарланып отыр.
