Қоғамның мәдени деңгейі – оның өркениеттілігінің басты көрсеткіштерінің бірі. Әрбір азаматтың қоғамдық орындардағы әдептілігі, айналасына деген құрметі мен жауапкершілігі мәдениетті қоғам қалыптастырудың маңызды негізі болып табылады.
Мәдениет – тек өнер мен әдебиет қана емес, ол күнделікті өмірдегі қарым-қатынас, қоғамдық тәртіпті сақтау, қоршаған ортаны таза ұстау, үлкенге құрмет, кішіге ізет көрсету сияқты құндылықтарды қамтиды. Қазақстанның мәдени саясатында ұлттық құндылықтарды сақтау, азаматтық жауапкершілікті арттыру және мәдени мұраны дәріптеу қоғам дамуының маңызды бағыттарының бірі ретінде айқындалған.
Әрбір тұрғын өз үйінің ауласын, көшесін, саябағын таза ұстап, қоғамдық мүлікке ұқыпты қараса, туған өлкеміздің келбеті де көркейе түседі. Қоқысты арнайы орындарға тастау, қоғамдық орындарда тәртіп сақтау, айналадағы адамдарға сыйластықпен қарау – мәдениеттің айқын көрінісі.
Сонымен қатар, жастардың бойына ұлттық салт-дәстүрді, адамгершілік пен ізгілік қағидаларын сіңіру – қоғамның ортақ міндеті. Өйткені мәдениетті ұрпақ – елдің жарқын болашағының кепілі.
«Айналаңды мәдениетпен нұрландыр» қағидаты – әр адамның күнделікті өмір салтына айналуы тиіс. Әрбір игі іс, әрбір сыпайы сөз, әрбір жауапты әрекет қоғамдағы өзара сыйластықты нығайтып, мәдениетті ортаның қалыптасуына ықпал етеді.
Мәдениетті қоғам – таза ортадан, ізгі қарым-қатынастан және азаматтық жауапкершіліктен басталады. Сондықтан айналамызға жанашырлықпен қарап, мәдениетті өмір салтын бірге қалыптастырайық.
