Мұнай бағасының төмендеуі әлемдік инфляция қаупін азайтуы мүмкін, бірақ жағдай әлі толық тұрақтанған жоқ, деп хабарлайды , «ҚазАқпарат» халықаралық ақпарат агенттігі.
Тамыз айындағы жеткізілімге арналған Brent маркалы мұнай фьючерстері 1,13%-ға төмендеп, барреліне 78,65 долларды құрады, ал шілде айындағы WTI келісімшарттары 1,26%-ға төмендеп, барреліне 75,82 доллар шамасында болды.
Халықаралық энергетика агенттігі (ХЭА) қақтығыстың ұзақ мерзімді шешімі келесі жылы ұсыныстың айтарлықтай өсуіне және мұнайдың үлкен профицитіне әкеледі деп күтеді. Ұйым мәліметі бойынша, әлемдік ұсыныс 2026 жылы тәулігіне орта есеппен 3,9 миллион баррельге төмендеп, 102,4 миллионға жетеді, ал 2027 жылы тәулігіне 110,3 миллион баррельге дейін қалпына келеді.
New York Life Investment Management есебінде мұнай бағасының төмендеуі әлемдік инфляция қаупін азайтуы мүмкін екендігі, бірақ жағдай әлі толық тұрақтанбағаны айтылған.
Компания сарапшылары бағаның қақтығысқа дейінгі деңгейден жоғары екенін, кеме қатынасын қалыпқа келтіру уақытты қажет ететінін, ал стратегиялық қорларды әлі де толықтыру қажет екенін атап өтті.
Бұған дейін АҚШ пен Иран бейбітшілік келісімге келгені хабарланған болатын. Бейбітшілік келісіміне ресми қол қою рәсімі 19 маусымда Швейцарияда өтуі мүмкін. Екі ел арасындағы бейбітшілік келісімі Ормуз бұғазының ашылуына және әлемдік нарықта шикізат жеткізілімінің артуына әкелуі ықтимал.
АҚШ пен Иран арасындағы атысты тоқтату туралы келісім БҰҰ-дан қолдау тапты.
ҚР Президенті Қасым-Жомарт Тоқаев та Вашингтон мен Тегеран арасындағы келісімдерді құптады.
