Жамбыл ауданының №10 бірмандаттық аудандық сайлау округі бойынша аудандық мәслихат депутаттығына «Әділет» партиясынан ұсынылған кандидат Нышанбек Сматұлы Малдыбаевтың ресми сайлауалды бағдарламасы мен өмірбаяндық деректеріне сәйкес, оның басты мақсаты – туған өңірінің инфрақұрылымын жаңғыртып, тұрғындардың өмір сүру сапасын жақсарту.
1964 жылы Жамбыл ауданына қарасты Бірлесу-Еңбек ауылында дүниеге келген ол өмірінің басым бөлігін білім беру саласы мен қоғамдық қызметке арнаған. Шымкент педагогикалық институтында тарих пәнінің мұғалімі, кейін Тараз мемлекеттік университетінде психолог мамандығы бойынша білім алған тәжірибелі маман еңбек жолын ауыл мектебінде пионер жетекшісі болып бастаған.
Ұзақ жылдар бойы ұстаздық етіп, 1993–2013 жылдар аралығында Ә. Тарази, Б. Кейкіев және Б. Момышұлы атындағы орта мектептерді басқарған Нышанбек Малдыбаев бүгінде Б. Момышұлы атындағы мектеп-гимназияда тарих пәнінен сабақ береді. Сонымен қатар Жамбыл аудандық мәслихатының VIII шақырылым депутаты ретінде өңірдің түйткілді мәселелерін шешуге атсалысқан. Оның еңбегі «Қазақстан Республикасы Білім беру ісінің құрметті қызметкері» төсбелгісімен, Жамбыл облысының «Құрметті ардагері» және «Жамбыл ауданына сіңірген еңбегі үшін» медальдарымен бағаланған.
Кандидаттың 2026–2031 жылдарға арналған сайлауалды құжатында аудан мен Аса ауылының дамуына қатысты 10 негізгі бағыт айқындалған. Атап айтқанда, жол және көлік инфрақұрылымын жақсарту аясында 2029 жылы Аса ауылындағы айналма жолдың аудандық маңызы бар бөлігін, «Құмтиын – Өрнек – Ерназар» автожолын және ауылішілік көшелерді жөндеу мәселесін көтеру жоспарланған. Коммуналдық салада жеке тұрғын үйлердегі ауызсу қысымын реттеу, тозған желілерді жаңарту, көшелерді жарықтандыру және «Шаңырақ» алқабын толық газбен қамту міндеттері белгіленген.
Бағдарламада ауыл кәсіпкерлігі мен шаруа қожалықтарын қолдауға ерекше мән берілген. «Ауыл аманаты» бағдарламасы арқылы жеңілдетілген несие алуға жәрдемдесу, кооперативтер мен отбасылық бизнесті дамыту, мемлекетке қайтарылған жерлер есебінен жайылым тапшылығын шешу және жаңа жұмыс орындарын ашу көзделген. Әлеуметтік салада аудандық аурухананы күрделі жөндеуден өткізуге, «Дипломмен ауылға» жобасымен медицина мамандарын тартуға, сондай-ақ Б. Момышұлы атындағы мектеп-гимназия мен «Балдырған» балабақшасының материалдық-техникалық базасын нығайтуға ықпал ету қарастырылған.
Бұдан бөлек, қарттар мен мүгедектігі бар азаматтарға кедергісіз орта қалыптастыру, шалғай ауылдарда байланыс пен интернет сапасын арттыру және «Жасыл ел», «Жастар тәжірибесі» жобалары арқылы жастарды қолдау шаралары қамтылған. Бағдарламада көрсетілгендей, кандидат нақты міндеттердің орындалуына, бастамалардың аудан бюджетінде ескерілуіне және сайлаушылар алдында ашық есеп беруге басымдық береді.
Дайындаған: «ID Corp» ЖШС.
Тапсырыс беруші: Н.С. Малдыбаев.
№10 бірмандаттық аудандық сайлау округі бойынша Жамбыл аудандық мәслихатының депутаттығына кандидаттың сайлауалды үгіт материалы республикалық бюджет қаражаты есебінен төленді.







