АСТАНАДА «ЭКСПО-2017» ХАЛЫҚАРАЛЫҚ КӨРМЕСІНЕ ОРАЙ ЖАМБЫЛ ОБЛЫСЫНЫҢ МӘДЕНИЕТ КҮНДЕРІ МӘРЕСІНЕ ЖЕТТІ
Бес күн бойы астаналықтар мен елорда қонақтарына ежелгі Тараздың 2000 жылдан аса тарихын таныстырып, Әулиеата жерінің тұмса табиғатын әнге арқау етіп, бас қаланың абыройын асқақтатып, Сарыарқаның сары даласына 1500 шақырым жерден керуен аттандырып жұртшылықты таң тамаша еткен Жамбыл облысының мәдениет күндері өз мәресіне жетті.
Бір жұма ішінде мамыр айында Тараздан Астанаға бет бұрған «Көне Тараздан – асқақ Астанаға тарту» этно-керуенінің елордаға жетуі, «Ханшатыр» ойын сауық орталығы маңындағы «Ғашықтар саябағында» Облыстық халық шығармашылығы орталығының ұйытқы болуымен өткен Жамбыл облысының аудан өнерпаздарының күн сайынғы мерекелік концерттері, «Қазанат» қалалық ипподромындағы Этноауылда өткізілген мәдени-көпшілік шаралар, аспан астындағы «Тараз-тарихтың діңгегі» атты көрмесі, ЭКСПО маңындағы Амфитеатрда қалың көпшілікті, елордаға келген туристерді өнерлерімен таң-тамаша еткен Қазақстанға белгілі мәдениет қайраткерлері мен облыс әншілерінің «Әуені әсем Әулиеата» атты гала концерті, облыстық ақындар айтысы, Жамбыл облыстық қазақ және орыс драма театрларының аншлаг жасаған қойылымдары, ұлттық спорт ойындарының өткізілуі, Жамбыл облысы тауар өндірушілерінің көрме-жәрмеңкесі, қолданбалы қолөнер шеберлерінің көрмесі және бұдан өзге бірнеше атаулы шараның барлығы еліміздің әлем алдында абыройын асқақтатқан «ЭКСПО-2017» халықаралық көрмесіне Тараз жерінің үлкен тартуы болып саналады. Осы аптаның ішінде Астана қаласының жұртшылығы Тараз жерінің тарихымен танысып, ұлттық сәлт-дәстүрімізбен сусындап, ән мен жырға бөленіп шат-шадыман күйге бөленді.
— 26-шілде мен 30 шілде аралығында Астана қаласында «ЭКСПО-2017» халықаралық мамандандырылған көрмесіне орай Жамбыл облысы күндері өз деңгейінде өтті. Бұл атаулы күндерге Жамбыл облысы әкімдігінің мәдениет басқармасына қарасты барлық мекемелер, аудандардың өнер ұжымдары, ЖОО өнерпаздары белсене атсалысты. Осы бес күн ішінде қазақ ұлтының барлық салт-дәстүрлері дәріптелді. Бұл мәдени көпшілік шаралардың басты ерекшеліктері — Ұлы Жібек жолы бойындағы керуен тоқтаған Тараз жерінен тарту ретінде «Көне Тараздан – асқақ Астанаға тарту» атауымен үлкен керуеннің елордаға келуі және «Ханшатыр» ойын-сауық орталығының алдындағы «Ғашықтар саябағына» тарихи Тараздың 300 ден аса көне археологиялық жәдігерлермен бірге әмбебап, жаңа технологиялы голлограммасы бар киіз үйдің астаналықтардың назарына ұсынылуы болды. Тағы айта кетерлік жәйт, осы орында көпшілік үшін күн сайын аудан өнерпаздарының концерті қойылды. Астаналықтардың мәз-мейрам, шаттыққа толы жүздерін көріп, «ЭКСПО-2017» көрмесіне сый ретіндегі Жамбыл облысының мәдениет күндері өз деңгейінде мәнді, мазмұнды болып өтті деген ойдамын — деді Жамбыл облысы әкімдігінің мәдениет,құжаттама және архивтер басқармасының басшысы Дүйсенәлі Бықыбаев.
Мәдениет күндерінің ашылу салтанатына Жамбыл облысының әкімі Кәрім Көкірекбаев пен бірге Астана қаласының әкімі Әсет Исекешов арнайы қатысып Тараздықтардың мерейін асырды.
Мәдениет күндері барысында Тараздық Әсел Уашева, «Ақкербез» би ансамблі, Бахром Муминов, «Bryce» тобы сынды жас таланттардың жұлдызы жанғаны жасырын емес. Оны халықтың ерекше қошемет қолдауынан айқын аңғардық. Астаналықтардың түрлі шаралар барысында бұл өнерпаздарға деген құрметі мен ықыласы ерекше болды.
Осылайша жоғары дәрежеде өткен Жамбыл облысының мәдениет күндері «Ханшатыр» ойын сауық орталығы маңындағы «Ғашықтар» саябағында облыс өнерпаздары мен эстрада жұлдыздарының «Таразым – тарих ақ таңы, Астанам – елдің мақтаны!» атты гала концертімен аяқталды. Қорытынды шараға елімізге танымал және Әулиеата өңірінің мақтаныштары Сәуле Желдібаева, Құрмаш Маханов, Индира Расылхан, Оңал Азаматова, Мадина Сағымбекова, Маралбек Бабақұлов, Жанна Асанқұлова сынды әншілер мен өнерпаздар қатысты. «ЭКСПО-2017» халықаралық мамандандырылған көрмесіне орай Астана қаласында Жамбыл облысы әкімдігінің мәдениет, құжаттама және архивтер басқармасының тікелей ұйымдастыруымен өткен Жамбыл облысы күндері талайға дейін бұқараның есінен кетпесі мәлім. Халықтың қуанышты жүзі мен шаттыққа толы жүздерін байқадық. Жамбылдықтар осылайша Астанаға арнайы ат арылтып келіп дүбірлі әрі маңызды күндерді керемет деңгейде өткізіп өз діттеген мақсаттарына жетті.
Арайлы Жақсылық
