Көкпардағы қайрат, аударыспақтағы ептілік, жамбы атудағы мергендік пен тоғызқұмалақтағы зеректік – бабалардан жеткен дәстүрлі спорттың өзіндік ерекшелігін айқындайды. Бүгінде осы мұраны жаңғыртып, жас ұрпақ арасында кеңінен насихаттау маңызды міндеттердің біріне айналып отыр. Осы бағытта Жамбыл облысында ұлттық спорт түрлерін дамытуға басымдық беріліп, тұрғындардың тұрақты айналысуына қолайлы жағдай жасалуда. Қазіргі таңда өңірде ұлттық спорт түрлерімен 24 110 адам шұғылданады. Бұл облыстағы спортшылардың жалпы санының 18,2 пайызын құрайды. Ал осы бағытта 128 жаттықтырушы еңбек етіп, спортшылардың шеберлігін шыңдауға және дәстүрлі спорт түрлерінің аясын кеңейтуге үлес қосып келеді. Өңірде көкпар, аударыспақ, теңге ілу, жамбы ату, қазақ күресі, тоғызқұмалақ, құсбегілік, асық ату, дәстүрлі садақ ату, бәйге мен жекпе-жек сияқты спорт түрлерін дамытуға мән берілген.
Ұлттық спортты кәсіби деңгейде дамытуда 2017 жылы құрылған «Әулие-Ата» кәсіпқой клубының орны ерекше. Бүгінде клуб жеті спорт түрі бойынша жұмыс жүргізіп, 293 спортшыны біріктіріп отыр. Олар көкпар, аударыспақ, теңге ілу, жамбы ату, тоғызқұмалақ, құсбегілік және асық атумен айналысады. Спортшылардың дайындығын 14 жаттықтырушы жүргізеді. Клубта Қазақстан Республикасының еңбек сіңірген спорт шебері атағына ие бір спортшы, Қазақстан Республикасының спорт шебері атағын иеленген 32 спортшы және спорт шеберіне үміткер 18 спортшы жаттығады. Бұл көрсеткіштер ұлттық спорттың өңірде кәсіби бағытта дамып, жоғары деңгейдегі жарыстарға қатыса алатын спортшылар қалыптасып келе жатқанын аңғартады.
Жамбылдық спортшылардың әлеуеті ұлттық құрама командалар сапынан да көрініс тапқан. «Әулие-Ата» клубының 17 спортшысы Қазақстанның негізгі ұлттық құрама командасына, 12 спортшысы жастар құрамасына, тағы 11 спортшысы жасөспірімдер құрамасына енген. Аталған көрсеткіш спортшылардың кәсіби дайындығы мен ұлттық спорт бағытындағы жүйелі жұмыстың нәтижесінен сыр шертеді. Сонымен бірге жас спортшылардың ұлттық құрама сапына қосылуы олардың алдағы жарыстарда тәжірибе жинақтап, шеберлігін жетілдіруіне мүмкіндік береді.
Ұлттық спортты дамыту жұмыстары облыс орталығымен ғана шектелмейді. Ауыл-аймақта да балалар мен жасөспірімдердің дәстүрлі спорт түрлерімен айналысуына жағдай жасалып келеді. Соның бірі 2018 жылы ашылған Қордай ауданындағы №19 балалар-жасөспірімдер спорт мектебі. Мұнда бүгінде көкпар, аударыспақ, жамбы ату, тоғызқұмалақ, асық ату, қазақ күресі және бәйге түрлері бойынша 296 спортшы жаттығады. Олардың дайындығына 13 жаттықтырушы жауапты. Балаларды жастайынан ұлттық спортқа баулу олардың физикалық қабілетін дамытып қана қоймай, бойына табандылық, төзімділік, ептілік пен жауапкершілік қасиеттерін қалыптастыруға ықпал етеді. Әсіресе ауылдық жерлерде дәстүрлі спорт түрлеріне қызығушылықты арттырудың маңызы зор. Өйткені ұлттық ойындар мен спорттық жарыстар жас ұрпақты салауатты өмір салтына баулумен қатар, ата-баба мұрасын тануға жол ашады. Сонымен қатар облыстағы жекпе-жек кәсіпқой спорт клубы, облыстық және аудандық балалар-жасөспірімдер спорт мектептері арқылы да ұлттық спортпен шұғылдануға мүмкіндік қарастырылған. Мұндай ұйымдардың жұмысы спортшылардың қабілетін шыңдауға, жаттығу үдерісін жүйелі ұйымдастыруға және ұлттық спорт түрлерін кеңінен насихаттауға бағытталған.
Ұлттық спорттың құндылығы – оның жарыс нәтижесімен ғана өлшенбейтінінде. Мәселен, көкпар мен аударыспақ күш пен ептілікті қажет етсе, жамбы ату мен дәстүрлі садақ ату мергендікке баулиды. Тоғызқұмалақ логикалық ойлау мен есепке жүйріктікті дамытса, асық ату баланың дәлдігі мен шапшаңдығын жетілдіреді. Ал қазақ күресі мен бәйге халқымыздың спорттық дәстүрлерін бүгінгі күнмен сабақтастырады. Сондықтан ұлттық спортты дамыту – бұқаралық спортты өркендетудің ғана емес, ұлттық құндылықтарды сақтап, оны келесі ұрпаққа жеткізудің де маңызды жолы. Жамбыл облысында ұлттық спорт түрлерімен айналысатын 24 мыңнан астам адамның болуы, кәсіпқой клуб пен спорт мектептерінің жүйелі жұмысы бұл бағыттағы әлеуеттің жоғары екенін көрсетеді. Ал жаттықтырушылардың еңбегі мен жас спортшыларға жасалған жағдай ұлттық спорттың болашағына негіз қалайды.
Бабалардан жеткен дәстүрді жаңғырту – бүгінгі ұрпақтың ортақ міндеті. Ұлттық спортқа қызығушылық артқан сайын оның тәрбиелік мәні де тереңдеп, қоғамдағы орны нығая түседі. Осы тұрғыдан алғанда, Жамбыл облысында қолға алынған жұмыстар ұлттық мұраны дәріптеуге, салауатты өмір салтын қалыптастыруға және спорттық әлеуеті жоғары жас буынды тәрбиелеуге бағытталған маңызды қадам болып қала береді.
Мақала Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды







