Тараз қаласы әкімдігінің сәулет және қала құрылысы бөлімін бұған дейін басқарған Арман Абдешов пен Алмасбек Бөбеев сот отырысында жауап берді. Екі айыпталушы да өздеріне тағылған айыпты мойындамайтынын мәлімдеді.
Соттағы жауабында Арман Абдешов Тараз қаласындағы бірқатар ірі нысандар мен қоғамдық кеңістіктердің сәулеттік шешімдеріне автор ретінде қатысқанын айтты. Оның сөзінше, олардың қатарында Тектұрмас, Шахристан, Жеңіс саябағы, субұрқақтар, Үшбұлақ, Білім алаңы және Әулиеата мешіті бар.
Сондай-ақ ол Асқаров көшесінің соңында орналасқан жаңа №16 шағын ауданға жылуды жылу электр орталығынан тартқаннан гөрі автономды газбен жылыту жүйесін қарастыру бюджет үшін тиімді болғанын алға тартты.
Абдешов аудит қорытындысымен келіспейтінін айтып, өзінің атқарылған жұмыстардың мән-жайын білетінін және тиісті жұмыстар қаулылар негізінде жүргізілгенін мәлімдеді.
«Айыбымды мойындамаймын. Сотқа сенемін. Істің әділ қаралып, ақтау үкімінің шығарылуын сұраймын», – деді ол сотта.
Ал Тараз қаласы әкімдігінің сәулет және қала құрылысы бөлімінің тағы бір бұрынғы басшысы Алмасбек Бөбеев өзіне тағылған айыпты мойындамады.
Оның айтуынша, қаралып отырған кезеңде тиісті классификаторлар болмаған, ал олар 2024 жылы енгізілген. Бөбеев өзі басшылық еткен кезеңде Тектұрмас пен Оңтүстік шағын ауданы бойынша екі егжей-тегжейлі жоспарлау жобасының (ПДП) қабылданғанын айтты.
«Ол кезде талаптар бойынша классификаторлар болған жоқ. Классификатор 2024 жылы енгізілді. Екі ПДП қабылдадым – Тектұрмас пен Оңтүстік шағын ауданы бойынша. Кінәмді мойындамаймын», – деді Бөбеев.
Сот талқылауында келтірілген залал көлеміне қатысты да пікірталас жалғасуда. Іс материалдарында айтылған мәліметтер бойынша, Шымкентке қатысты эпизод бойынша залал толық көлемде өтелген, ал Тараз эпизоды бойынша залал өтелмеген.
Қорғау тарапы сараптама қорытындысына күмән келтіріп, залалдың бар-жоғына қатысты тұжырымдармен келіспейтінін білдірді. Сонымен бірге сот барысында Тараз қаласы әкімдігінің залалға қатысты ұстанымының өзгеру себептері де сөз болды.
Енді сот процесінде тараптардың жарыссөзі өтуі тиіс.
Осыған дейін, «Залал жоқ» деді әкімдік өкілі: Тараздағы сотта 137 миллион теңге, 11 жоба және сарапшы дауы сөз болды
Тараз қаласының №2 сотында бұрынғы мемлекеттік қызметшілер Нұрбол Жүнісбеков, Алмасбек Бөбеев, Арман Абдешов, сондай-ақ сәулетшілер Қасиет Тәшімбетов пен Нұрбол Нұртаевқа қатысты қылмыстық істі қарау жалғасуда.
Ескерту: сот үкімі заңды күшіне енгенге дейін айыпталушылар кінәсіз деп есептеледі.
