Тараз қаласы №2 сотында ҚР ҚК-нің 191-бабының 2-бөлігінің 1,3-тармақтарымен айыпталған І.-ге қатысты қылмыстық іс қаралды.
Сотталушы І., 13.03.2017 жылы сағат 12:00 шамасында Тараз қаласы Жамбыл даңғылы бойында орналасқан Жамбыл облыстық медициналық колледжінің алдына, өзінің қылмыстық сыбайласы сотқа берілмеген тұлғамен бөтеннің мүлкін күш қолданып, адамдар тобының алдын ала сөз байласуымен ашық түрде жымқырып пайда табуды мақсат етіп келген. Ол жақтан І.-мен сотқа берілмеген тұлға екеуі өздерінің ортақ таныстары, тергеумен толық аты-жөндері анықталмаған «А.» және «С.» есімді жігіттерді жолықтырған. Сол кезде олардың қасынан өздеріне таныс емес үш жігіт, яғни Б., Т. және А. өткен. Содан І. сотқа берілмеген тұлғамен алдын ала құрған қылмыстық жоспарға сай соңғылардың мүлкін, ашық түрде жымқыру қылмыстық ойын жүзеге асыру үшін І. соңғыларға ысқырып тоқтатып алып, қайдан болатындарын сұрап, сылтау етіп әңгімеге айналдырып, оларды Жамбыл даңғылының Котовский көшесімен қиылысына ертіп барған. І. және А. оңаша 5 минут сөйлесіп тұрып кейін қылмыстық сыбайласы сотқа берілмеген тұлғаның қасына келген кезде, соңғысы алдын ала сөз байласқандай Б.-дан ашық түрде ұялы телефонын жымқыра алмағандықтан І.-ге ашулы күйде тұрып Б.-ны қолымен нұсқап көрсетіп «мынамен оңаша барып сөйлесіп қайтшы» деген. Өз кезегінде І. Б.-ны оңаша сөйлесуге шақырып, Котовский көшесінің бойымен ары қарай алып кеткен. Сол арада оқиға орнында І. өзінің физикалық тұрғыдағы басымдылығын түсініп, Б.-дан ұялы телефонын талап еткен және егер де соңғысы ұялы телефонын бермеген жағдайда оның өмірі мен денсаулығына қауіпті емес күш қолданып, пышақтап кететінін айтып қорқытып, соңғының көкірек тұсынан жұдырықталған қолымен бір рет соққы жасаған. Содан өзінен соңғысы қорқып тұрғанын көріп, соны пайдалана отырып Б.-дан ұялы телефонын қайта талап еткен. Б. оның талабын орындаудан үзілді-кесілді бас тартқанына І. ашуланып өзін ұрып-соғатынын айтып, сөзбен пышақ сұғып аламын деп қорқытқан. Сөйтіп тұрғандарында қылмыстық сыбайласы сотқа берілмеген тұлға олардың жанына жүгіріп келіп, ана жақта полиция қызметкерлері жүр деп хабар берген. Сол кезде І. Б.-ны одан ары адамдар жүрмейтін жаққа қарай алып кеткен. Сол сәтте Б. өзінің өмірі мен денсаулығына қауіп төніп тұрғанын түсініп, күртешесінің қалтасынан құны 1000 теңге болатын көк түсті қабы бар, ішінде құны 1500 теңге болатын 8 … … .. .. нөмірімен, құны 75 000 теңге болатын «Samsung Galaxy S5 mini» маркалы ұялы телефонын шығарып І.-ның қолына берген. Соңғысында қандай да болсын басқа мүліктің жоқтығына көзі жеткен І. жоспарға сәйкес, адамдар тобымен күш қолданып ашық түрде жымқырған ұялы телефонын алып, қылмыстық сыбайласы сотқа берілмеген тұлғамен бірге оқиға орнынан бой тасалаған.
Сөйтіп І. және сотқа берілмеген тұлға өздерінің қылмыстық іс әрекеттерімен жәбірленушіге жалпы құны 77500 теңгеге материалдық залал келтірген.
Тараз қаласы №2 сотының 18.05.2017 жылғы үкімімен І. 191-бабының 2-бөлігінің 1,3-тармақтарымен кінәлі деп танылып, оның меншігіндегі, қылмыстық жолмен табылған не қылмыстық жолмен табылған қаражатқа сатып алынған мүлкі тәркіленіп, 4 (төрт) жыл мерзімге бас бостандығын шектеу жазасы тағайындалған.
Үкім заңды күшіне 05.06.2017 жылы енген.
Автор: Тараз қаласы №2 сотының судьясы А.Ш.Қорабаева
