Мойынқұм ауданының Хантау ауылында тұрғындарды сапалы ауыз сумен қамтамасыз етуге бағытталған маңызды инфрақұрылымдық жоба – таза сумен жабдықтау және су тарату құрылысының салтанатты ашылу рәсімі өтті. Бұл нысан ауыл тұрғындарының өмір сүру сапасын арттыруға және елді мекеннің инженерлік инфрақұрылымын дамытуға бағытталған әлеуметтік маңызы зор жобалардың бірі болып саналады.
Салтанатты іс-шараға Мойынқұм ауданы әкімінің уақытша міндетін атқарушы Әлібек Нұрадинов, ауылдың ақсақалдары мен ардагерлері, мекеме басшылары және ауыл тұрғындары қатысты.
Жиын барысында сөз сөйлеген аудан әкімінің уақытша міндетін атқарушы Әлібек Нұрадинов Мемлекет басшысының халықты сапалы ауыз сумен қамтамасыз ету жөніндегі тапсырмаларын іске асыру аясында аудан көлемінде жүйелі жұмыстар жүргізіліп жатқанын атап өтті. Ол жаңа нысанның пайдалануға берілуі Хантау ауылының әлеуметтік дамуына тың серпін беріп, тұрғындардың тұрмыс сапасын жақсартуға зор үлес қосатынын жеткізді.
Жобаның жалпы құны 533 миллион теңгені құрайды. Нәтижесінде 900-ге жуық тұрғыны бар Хантау ауылы орталықтандырылған таза ауыз сумен қамтамасыз етіліп, тұрғындардың көптен күткен мәселесінің бірі өз шешімін тапты.
Салтанатты рәсім барысында ауыл ақсақалы Болат Қуанышбаев ақ батасын беріп, игі бастамаға өзінің ізгі тілегін білдірді. Одан кейін құрметті қонақтар мен ауыл тұрғындарының қатысуымен нысанның лентасы салтанатты түрде қиылып, арнайы тетік іске қосылып, су тарату жүйесі ресми түрде пайдалануға берілді.
Жаңа су жүйесінің іске қосылуы тұрғындарды сапалы ауыз сумен үздіксіз қамтамасыз етіп қана қоймай, санитарлық-эпидемиологиялық жағдайдың жақсаруына, халықтың әл-ауқатының артуына және ауылдың одан әрі әлеуметтік-экономикалық дамуына оң ықпал ететін болады.
Ауыл халқы бұл маңызды жобаның жүзеге асуына ризашылықтарын білдіріп, жаңа нысанның ел игілігіне ұзақ жылдар қызмет етуіне тілектестік танытты.
Хантау ауылында пайдалануға берілген бұл әлеуметтік маңызы бар нысан – халықтың тұрмыс сапасын арттыруға бағытталған мемлекеттік бағдарламалардың нақты нәтижесі. Таза су – денсаулықтың, берекенің және ауылдың тұрақты дамуының кепілі.
Материал «Мойынқұм ауданы әкімдігінің ішкі саясат бөлімі» КММ тапсырысы бойынша әзірленді.
