Жамбыл облысы әкімдігінің мәдениет және тілдерді дамыту басқармасының қолдауымен, Жамбыл облыстық айтыскер ақындар, жыршы-термешілер орталығы ұйымдастырған өнер додасы еліміздің әр өңірінен келген талантты жыршылардың басын қосты. Бұл байқау халқымыздың ғасырлар қойнауынан жеткен жыршылық дәстүрін жаңғыртып қана қоймай, жас өнерпаздардың шығармашылық мүмкіндіктерін танытуға кең жол ашты.
Байқаудың шешуші кезеңі Ш.Мұртаза атындағы Руханият және тарихтану орталығында өтті. Алдын ала іріктеуден сүрінбей өткен сегіз өнерпаз қазақтың төл өнеріндегі шеберліктерін ортаға салды. Қатысушылар Жамбыл Жабаевтың шығармаларынан және эпостық мұралардан үзінді орындап, өздерінің орындаушылық деңгейі мен сахналық мәдениетін көрсетті.
Өнер сайысының қорытындысы бойынша Бас жүлде Жамбыл облысының намысын қорғаған Бекарыс Көштаевқа бұйырды. Арнайы марапатты Жамбыл облысы әкімдігінің мәдениет және тілдерді дамыту басқармасы басшысының орынбасары Гүлдана Серікбаева табыс етті.
Жүлделі I орынды Түркістан облысынан келген Жасұлан Есімхан иеленді. II орын Ақтөбе облысының өкілі Бақыт Арыстанғалиеваға табысталды. III орын Тараз қаласының өнерпазы Мансұр Әлішев пен Алматы облысының намысын қорғаған Рүстембек Молдыбаевқа бұйырды. Сонымен қатар Астана қаласынан келген Аида Орынбасарова мен Аяулым Тәженова, сондай-ақ Жамбыл облысының өкілі Сәрсенбай Әбілқайыр арнайы Алғыс хаттармен марапатталды.
Байқау жеңімпаздарын марапаттау рәсімі Тараз қаласындағы “Достық үйінде”ұйымдастырылған гала-концертпен түйінделді. Кеш барысында дәстүрлі өнердің көрнекті өкілдері мен байқау лауреаттары өнер көрсетіп, көрермендерге ұлттық рух пен тағылымға толы әсерлі кеш сыйлады.
