Әсіресе үлкен қала тұрғындары үшін тиімді бұл жүйе азаматтарға үйден шықпай-ақ құлшылықтарын өтеуге мүмкіндік береді. Арнайы әзірленген сайт арқылы құрбандық малын таңдап, төлемді Kaspi QR жүйесімен жедел жүзеге асыруға болады. Шарт бойынша, қой мен ешкі бір адамның атынан шалынса, ірі қара мен түйе малын бір адам немесе 7 адам бірігіп шала алады.
Тапсырыс сәтті қабылданған жағдайда қолданушының ұялы телефонына растаушы SMS хабарлама жолданады. Ең бастысы, рәсімнің ашықтығын қамтамасыз ету мақсатында мал сойылған соң, оның фото және бейне есебі тапсырыс беруші көрсеткен нөмірге жіберіледі. Биылғы бекітілген бағалар бойынша, бір қойдың құны — 125 мың теңге, ал ірі қара малы — 875 мың теңге көлемінде белгіленген. Барлық шалынған құрбандық еттері мұқтаж жандар мен қайырымдылық мекемелеріне таратылады.
