Бұл туралы Polisia.kz ақпараттық медиа-порталына сілтеме жасап Turaninfo.kz хабарлайды.
Ішкі істер органдарының мәліметінше, Алматы облысында терроризм актісі туралы көрінеу жалған хабарлама берген 9-сыныптың екі оқушысы ұсталды. Тергеу барысында олардың Астана қаласы мен Алматы облысы аумағында орын алған осындай 14 фактіге қатысы бар екені анықталды. Сонымен қатар, Шығыс Қазақстан облысындағы мектеп оқушысы әлеуметтік желідегі таныстарымен ерегісіп қалып, солардың атынан Шымкент әкімдігі мен Ақтаудағы сауда үйлерінің біріне «жарылғыш зат қойылды» деген жалған хат жолдаған. Күдіктілер өз әрекеттерін жасыру үшін анонимді телефон нөмірлері мен электронды пошталарды пайдаланған.
ҚР ІІМ Киберқылмысқа қарсы іс-қимыл департаменті басқарма бастығының орынбасары Аман Әубәкіров бұл мәселенің салдары өте ауыр екенін ескертті:
«Кез келген «қалжың» немесе ұтыс ойыны ретінде басталған әрекет — ауыр қылмыс болып саналады. Мұндай хабарламалар қоғамда негізсіз үрей туғызып, шұғыл қызметтерді нақты көмек көрсетуден алаңдатады. Заң бойынша мұндай әрекеттер үшін бас бостандығынан айыруға дейінгі жауапкершілік қарастырылған», — деді ол.
Бүгінде құқық қорғау органдары заманауи технологиялардың көмегімен кез келген құқық бұзушының жеке басын жедел анықтауға қауқарлы. Осыған байланысты, ата-аналарға балаларына заң алдындағы жауапкершілікті түсіндіру, ал азаматтарға тексерілмеген ақпаратты таратпау және кез келген қауіп туралы дереу «102» арнасына хабарлау қажеттігі ескертіледі.
