Іс-шара Жарлысу жеріндегі «Тау қымыз» демалыс аймағында ұйымдастырылып, ұлттық құндылықтарды дәріптеуге бағытталды.
Мерекеге аудан әкімі Ернар Есіркепов қатысып, құттықтау сөз сөйледі. Шара барысында дәстүрлі рәсімдер көрсетіліп, аналар күбі пісіп, қонақтарға қымыз бен ұлттық тағамдар ұсынылды. Қымызмұрындықтың мазмұны бие сауу рәсімі мен театрландырылған көріністер арқылы көрініс тапты.
Іс-шара аясында қолөнер шеберлерінің көрмесі ұйымдастырылып, ағаш, темір, теріден жасалған бұйымдар, зергерлік әшекейлер көпшілік назарына ұсынылды. Сонымен қатар жергілікті суретшілер мен оқушылардың туындылары, музей жәдігерлері көрермен қызығушылығын арттырды.
Жергілікті өнімдер жәрмеңкесінде «Гәкку құс», «Аллан», «Ақтоған» макарон өнімдері, аяқ-киім өндірісі және агросала жетістіктері таныстырылды. Заманауи ауыл шаруашылығы техникасы мен дрондардың жұмысы да көрсетілді.
Мереке аясында қазақ күресі, қол күресі, қошқар көтеру, қой қырқу сынды ұлттық спорт түрлерінен жарыстар өтті. Қошқар көтеру сайысында қатысушы Азамат 141 рет көтеріп, ерекше нәтиже көрсетті.
Сондай-ақ асыл тұқымды қой көрмесі ұйымдастырылып, еліміздің әр өңірінен келген шаруалар өз жетістіктерін ұсынды. Үздіктер арнайы марапаттарға ие болды.
Іс-шара тек мәдени мереке ғана емес, өңірдің туристік әлеуетін таныстыру алаңына айналды. Аудан әкімі туристік агенттіктермен кездесіп, ынтымақтастық туралы меморандумдарға қол қойды. Сарапшылардың пікірінше, өңір экотуризм мен этнотуризмді дамытуға үлкен мүмкіндікке ие.
Жалпы, Т. Рысқұлов ауданы табиғи және тарихи-мәдени ресурстары арқылы туризмді дамытуға қолайлы аймақтардың бірі ретінде бағаланып отыр.
