ҚР ғылым және жоғары білім министрі Саясат Нұрбек Үкімет отырысында уақыт талаптарына сәйкес білім беру бағдарламаларын жаңарту бойынша жүргізіліп жатқан жұмыстар туралы баяндады. Ол 2025 жылдан бастап барлық білім беру бағдарламаларына жасанды интеллектті қолдану дағдылары енгізілгенін атап өтті. Қазіргі уақытта 95 университет оқу жоспарына жасанды интеллектке қатысты пәндерді енгізді. Сонымен қатар 30 жоғары оқу орны жасанды интеллект бағыты бойынша 42 білім беру бағдарламасын жүзеге асыруда. Профессор-оқытушылар құрамының 54%-ы ЖИ бойынша біліктілікті арттыру курстарынан өтті.
Министр университет индустрияның сұраныстарына сәйкес пәнаралық бағыттар бойынша кадрлар даярлауға, сондай-ақ қолданбалы ғылыми зерттеулер жүргізуге бағытталатынын атап өтті. Оқу орны Alem.ai экожүйесіне біріктіріліп, жетекші шетелдік университеттермен және технологиялық компаниялармен әріптестікте дамиды.
Бүгінгі таңда жасанды интеллектті дамыту бойынша ауқымды жұмыстар жүргізілуде. Сонымен қатар алда жасанды интеллект университетін құрумен қатар бірқатар жүйелі шараны жүзеге асыру міндеті тұр. Негізгі мақсат – профессор-оқытушылар құрамын жасанды интеллект бойынша біліктілікті арттыру бағдарламаларымен 100% қамту және 100 мың студентті тарта отырып, AI-Sana бағдарламасының келесі кезеңін жүзеге асыру,
— деп толықтырды Саясат Нұрбек.
Astana Hub ҒЖБМ-мен бірлесіп әр өңірде университеттер базасында халықаралық оқыту әдістемелеріне сүйене отырып, Tomorrow School жобасын жүзеге асыруда. Бұл туралы ҚР ғылым және жоғары білім министрі Саясат Нұрбек Үкімет отырысында мәлімдеді. Министр мектептер барлық өңірлердің тұрғындары үшін тәулік бойы қолжетімді форматта жұмыс істейтінін, ал оқу процесі халықаралық оқыту әдістемелерінің негізінде құрылатынын түсіндірді. Қазіргі уақытта 4 өңірде компьютерлік техникамен жарақтандыру және Tomorrow School жобасы шеңберінде білім беру процесін ұйымдастыру үшін үй-жайларды бөлу мәселелері толығымен шешілді.
Сондай-ақ бүгін жобаны жүзеге асыруда белсенді қолдау көрсетіп жатқан Ақмола, Қостанай және Алматы облыстарының әкімдіктеріне алғысымызды білдіреміз. Қалған 15 өңірде компьютерлік техникамен қамтамасыз ету мәселелері пысықталуда,
— деп толықтырды Саясат Нұрбек.
