Қазақстан Республикасының Мемлекеттік кеңесшісі Ерлан Қарин жақында «Жас Алаш» газетінде жарық көрген «Кітап оқымайтын қоғам: Жалған статистикаға жасырынған шындық» атты материалға пікір білдірді. Аталмыш талқыға баспагерлер Шыңғыс Мұқан мен Арман Әлменбет, сондай-ақ кітапхана қызметкері Айдос Бектұрсын қатысқан болатын.
Мемлекеттік кеңесші көтерілген мәселенің өзектілігін атап өтіп, кітап оқуға ынталандыру – бүкіл қоғамның ортақ міндеті екенін баса айтты. Оның сөзінше, әсіресе жастарды әлеуметтік желінің ықпалынан шығарып, кітапқа бет бұрғызу – бүгінгі күннің басты сұранысы.
Мемлекеттің рөлі – жағдай жасау
Ерлан Қариннің айтуынша, мемлекет азаматтарды кітап оқуға міндеттей алмайды. Бірақ ол үшін барлық қажетті жағдайды қалыптастыруға тиіс.
Бұл бағытта соңғы жылдары бірқатар жүйелі қадамдар жасалды:
-
23 сәуір – Ұлттық кітап күні болып бекітілді;
-
Оқуға ұсынылатын 100 кітап тізімі жарияланды;
-
«Балалар кітапханасы» жобасы іске қосылды;
-
Amanat партиясы «Кітап-Amanat» жобасын жүзеге асыруда;
-
Алматы қаласында бірнеше кітапхана 24/7 форматында жұмыс істей бастады;
-
Президент бастамасымен тәулік бойы жұмыс істейтін заманауи кітапхана құрылысы басталуда.
Кітап қоры артып келеді
Қазақстандағы көпшілік кітапханалардың қорында бүгінгі таңда 72 миллионнан астам құжат бар. Тек биылдың өзінде олардың қатары:
-
1 029 568 жаңа баспа өнімімен,
-
2,2 миллионнан астам электронды кітаппен толықты.
Сонымен қатар онлайн оқуға арналған түрлі платформалар қолжетімді.
Кітап оқуға мүмкіндік бар, енді мәдениет керек
Ерлан Қарин елімізде кітап оқуға барлық жағдай жасалғанын атап өтті. Ендігі міндет – жаппай оқу мәдениетін дамыту, кітапқа қызығушылықты арттыру және оқырмандар ортасын қалыптастыру.
Мемлекеттік кеңесші қоғамда кітапқа деген сұранысты көбейту, үлгі болатын оқырман ұрпақты тәрбиелеу – барша азаматтың ортақ жауапкершілігі екенін атап өтті.
