Облыс әкімінің бастамасымен өткен өңірдің денсаулық сақтау саласында кәсіби құзыреттіліктері мен көшбасшылық қасиеттері жоғары деңгейде қалыптасқан медицина қызметкерлерін анықтау, өңірлік кадр пулын қалыптастыру мақсатында ұйымдастырылған «Денсаулық сақтау саласындағы үздік ұйымдастырушы» атты медицина қызметкерлері арасында өткен облыстық конкурсқа қатысып, өңірлік денсаулық сақтау ұйымын басқаруға дайын кәсіби көшбасшылар резервіне еніп, аурухананың байқау кеңесінің ұсынуымен Талас аудандық көпбейінді орталық ауруханасының бас дәрігері лауазымына Алмас Исаков тағайындалды.
Алмас Исаков 1985 жылы Жамбыл облысы, Жамбыл ауданында дүниеге келген.
2010 жылы И.К. Ахунбаев атындағы Қырғыз мемлекеттік медициналық академиясын «Қоғамдық денсаулық сақтау» мамандығы бойынша аяқтаған.
Еңбек жолын 2010 жылы «Гедеон Рихтер» фармацевтикалық компаниясында медициналық өкіл ретінде бастаған.
2017–2018 жылдары «Пфайзер» компаниясында негізгі клиенттермен жұмыс жөніндегі менеджер қызметін атқарған.
2018–2019 жылдары «Фармамед» компаниясында сату үйлестірушісі болып жұмыс істеген.
2020–2021 жылдары Жамбыл облыстық жедел медициналық жәрдем станциясында статистика бөлімінің меңгерушісі лауазымында қызмет еткен.
2022–2023 жылдары Тараз қаласындағы №7 қалалық емханада Пациентті қолдау және ішкі аудит қызметінің басшысы, сондай-ақ бас дәрігердің ұйымдастыру-әдістемелік жұмыс жөніндегі орынбасары болған.
2023–2024 жылдары Жамбыл облыстық көпбейінді ауруханасында дәрігер-статист қызметін атқарған.
2024 жылдың сәуір айынан бастап осы күнге дейін Жамбыл облыстық көпбейінді ауруханасы бас дәрігерінің инфекциялық бақылау және ұйымдастыру-әдістемелік жұмыс жөніндегі орынбасары лауазымында еңбек еткен.
