Бұл жөнінде Тараз қалалық №2 сотының төрағасы Мэлс Байсариев журналистермен болған баспасөз мәслихатында айтып берді. Оның айтуынша, 2016 жылдың 12 айында 708 тұлғаға қатысты 590 қылмыстық іс қаралған. Қаралған қылмыстық істердің ішінде 539 тұлғаға қатысты 451 қылмыстық іс үкім шығарумен аяқталған. Бұл қаралған қылмыстық істер бойынша 516 тұлға сотталып, 23 тұлға ақталған. Сондай-ақ 3 қылмыстық іс 2017 жылдың қаңтар айына қалдық болып өтіпті. Мұнымен қоса қылмыстық және қылмыстық іс жүргізу заңнамасы негіздерінде 78 тұлғаға қатысты 64 іс қысқартылған. Сонымен қатар 50 қылмыстық іс медиация тәртібі негізінде өз шешімін тапқан.
Есеп мерзімде сот өндірісіне жалпы 2198 материал түсіп, оның 2019-ы қаралып, 117 материал осы жылдың 1-ші тоқсанына қалдық болып өткен. Оның ішінде жаза түрін ауыстыру туралы 78, түзеу мекемесінің түрін ауыстыру туралы 165, мерзімінен бұрын шартты түрде босату туралы 729, жазаның өтелмеген бөлігін неғұрлым жеңіл жазаға ауыстыру туралы 425, мерзімінен бұрын шартты түрде босатуды бұзу туралы 16, кері күші бар қылмыстық заңның шығуына байланысты қылмыстық жазадан босату немесе жазаны жеңілдету туралы 322, шартты түрдегі соттылықты бұзу немесе сынақ мерзімін ұзарту туралы 105, медициналық сипаттағы мәжбүрлеу шараларын ұзарту, ауыстыру немесе тоқтату туралы 136, басқа да ұсыныстар, сонымен қатар үкiмдi орындау кезiнде туындаған қандай да болсын күмән мен түсiнiксiздiктi ұғындыру туралы 110 іс бар.
Сондай-ақ шаһардың қылмыстық істерін қарайтын сотына 2016 жылдың 12айында барлығы 1728 санкция материалдары түскен болса, оның 1720-ы қаралған. Және 1686 талап-тілек қанағаттандырылып, 34 санкция материалы бойынша қанағаттандырусыз қалдырылып, 5 іс қайтарылған.
— Санкция материалдары бойынша өткен жылы барлығы 1728 санкция материалдары түсті. Мұның барлығын судьяларымыз өз деңгейінде қарап, шешімін шығарды. Біз әрдайым журналистермен тығыз қарым-қатынаста жұмыс жасаймыз. Мәселен, есепті мерзім ішінде БАҚ беттерінде судьялармен, сот қызметкерлерімен және әр түрлі газеттердің тілшілерімен барлығы 151 мақала жарияланды. Оның ішінде радиодан, теледидардан сөйлеу 10 рет сұхбаттар берілді. Сонымен қатар, есеп беру 16 дөңгелек үстел, 15 семинар сабағы, 1 баспасөз мәжілісі, 7 ашық есік күні өткізілді, — дейді сот төрағасы Мэлс Жаулыбайұлы.
Сонымен қатар сот төрағасы 27 адамды түрлі мәселелермен қабылдап, мәселелерінің оң шешілуіне өз ықпалын тигізген. Қара қылды қақ жарып келе жатқан Тараз қалалық №2 соты өткен жылы облыстық 16 соттың ішінде 3 орынды иеленген.
Ш.Сейдуалиев
