11 наурыздан бастап Тараз қаласы аумағындағы қоғамдық көлікте жол жүру тарифі қымбаттайды.
Жол ақысы электрондық жол жүру картасы немесе электрондық төлемнің қосымша қызметтері арқылы қолма-қол ақшасыз жол ақысын төлеу кезінде 85 теңгеден 100 теңгеге дейін көтеріледі.
Сондай-ақ жол ақысын қолма-қол ақшамен төлеу кезінде – 130 (жүз отыз) теңге қалдырылды.
Мектеп оқушылары (7 жастан бастап) және 18 жасқа дейінгі адамдар 40 теңгеден 50 теңгеге көтеріледі, ал жол ақысын қолма-қол ақшамен төлеу кезінде – 65 теңге (130 теңгенің 50 пайызы) қалдырылды.
Нормативтік құқықтық актінің жобасы 10 қаңтар мен 24 қаңтар аралығында ашық НҚА порталында қоғамдық талқылауға жарияланды. Сонымен қатар, Жамбыл облысының кәсіпкерлер палатасының сараптамалық қорытындысы, Тараз қалалық Қоғамдық кеңестің ұсынымы, Тараз қалалық мәслихатының келісімі алынды. Жамбыл облысы Әділет департаменті, мемлекеттік органдардың интернет-порталына тіркеуге алынды.
Бүгінде жол жүру тарифін көтеру туралы шешім нарықтағы қосалқы бөлшектер мен жанар-жағармай бағасының өсуіне, жүргізушілер жалақысының көтерілуіне, қаланың әлеуметтік-экономикалық дамуына, тасымалдаушылардың шығындары есебінен туындайтын жергілікті бюджеттен бөлінетін қаржы жүктемесін азайтуға байланысты болып отыр.
Ескертпе: Тараз қаласында жол жүру тарифі соңғы рет 2021 жылдың 20 сәуірінде 65 теңгеден 85 теңгеге және мектеп оқушылары 30 теңгеден 40 теңгеге өзгертілген болатын.
