Қазақстан-Британ техникалық университеті ғимаратының 4-қабатында өрт шықты. Алматы қаласы Төтенше жағдайлар департаментінің іс-қимылымен өрт тез арада оқшауланып, жойылды. Зардап шеккендер жоқ.
«Қазіргі уақытта құзыретті органдармен бірлесіп, оқиғаның себептерін тексеру жүргізіліп жатыр. Қазақстан-Британ техникалық университеті студенттер мен қызметкерлердің қауіпсіздігін қамтамасыз ету үшін барлық қажетті шараларды қабылдайды. Оқу сабақтарының форматы мен кестесіне қатысты ақпарат жақын арада студенттерге жіберілетін болады», — делінген хабарламада.
Еске салайық, 11 қаңтарда кешке Алматы қаласындағы Төле би көшесінде орналасқан Қазақстан-Британ техникалық университеті (ҚБТУ) ғимаратынан өрт шықты.
Еске салайық, бұған дейін Алматы ТЖД бастығының орынбасары Чайзада Бағдад ТЖ департаментінің күштері мен құралдары Қазақстан-Британ университеті (ҚБТУ) ғимаратындағы өртке қарсы жұмыс істеп жатқанын айтты.
Өртті ауыздықтау 1951-1957 жылдары салынған, бес қабаттан тұратын ҚазКСР Жоғарғы Кеңесінің бұрынғы ғимаратының (Үкімет үйі) күрделі конструктивтік ерекшелігіне байланысты күрделене түскен.
Алдын ала мәліметтер бойынша төртінші қабаттағы бөлмелердің бірінде төбе жабыны жанған.
