Облыстағы жалғыз мемлекеттік университет деп саналатын М.Х.Дулати атындағы ТарӨУ студенттері жатақхана жағдайына шағымдануда. Олардың айтуынша, жатақхананың ахуалы күннен-күнге нашарлап барады екен. Жеке бас гигиенасына байланысты мәселелер неше жылдан бері айтылып келе жатқанына қарамастан әлі күнге дейін бір шешімін таппаған.
“Ол кір жуғыш машина. Бұл құрал қанша жыл болды тұрғанына. Ойлаңызшы бүкіл 5 қабатқа, оның ішінде ұлдарға да, қыздарға да тек осы бір кір жуғыш машина. Қашан барсаң осындай кезек. Киімімізді салсақ әрдайым сасып, дақ болып шығады. Мен киім жумай жүргеніме 2 апта болған шығар. Мен ары кетсе 2-3 жаңа кір жуғыш машинасы болу керек шығар деп ойлаймын. Сондай-ақ душ. Қалай жаз келсе немесе күн жылынса болды душымыз бірден осылай істемей тек мұздай су ағып тұрады. Шағымдансақ “Аристондағы су бітті, үнемдендер”, – дейді бізге хабарласқан студент.
Біз ол суды қай жерімізге үнемдейміз? Соңғы 1-2 ай есімде жоқ қашан душқа түскеніміз. Қашан барсан 3-і істейді, 3-і істемейді, жылы су ақпайды немесе шомылып жатып өшіп қалад. Осы мәселені шешуге болмайды ма? Қалай көктем келеді, душымыз мұз болады.
М.Х.Дулати атындағы ТарӨУ баспасөз хатшылығына хабарласып, болған мән жайлар бойынша ақпарат беруін өтінген болатынбыз.
М.Х. Дулати атындағы Тараз өңірлік университеті Басқарма мүшесі – әлеуметтік-мәдени даму жөніндегі проректор Аслан Тұрлыбектен төмеидегідей жауап келді:
«Инстаграм әлеуметтік желісінде университет жатақханасы туралы видео тараған болатын. Түсірілген видеоматериал жатақханада залалсыздандыру жұмыстары жүргізіліп жатқан тұста түсірілгенін өзіңізге хабарлаймыз. Яғни, 20-21 сәуір күндері университеттің технологиялық кешенінің №1 жатақханасында және 27-28 сәуір күндері педагогикалық кешенінің №3 жатақханасында залалсыздандыру (дезинфекциялық) жұмыстары толығымен жүргізілді.
Осы ретте, студенттердің денсаулығының қауіпсіздігін қамтамасыз ету мақсатында дезинфекция жұмыстарын жүргізу барысында технологиялық кешенінің №1 жатақханасынан №3 жатақханасына және №3 жатақханадан №1 жатақханаға уақытша 2 күнге көшірілген.
Бүгінгі таңда кір жуғыш машиналарының ескіруіне орай, жеке кәсіпкерлермен келісім-шарт жасалынып, жатақханаларға қойылатын қосымша 10 дана жаңа үлгідегі кір жуғыш машиналары университет қоймасына келді. Қазіргі уақытта алынған кір жуғыш машиналарын орнату үшін тиісті монтаждау жұмыстары атқарылуда.
Сонымен қатар, университеттің барлық жатақханаларындағы жуынатын бөлмелердегі душ кабинкаларындағы душ бөлгіштері (рассекатель) орнатылып, барлығы толықтай жұмыс жасап тұр.
Қалалық жылу жүйесі арқылы берілетін жылу су тоқтатылғаннан кейін жатақханалардағы аристондар іске қосылып пайдаланылуда. Жатақханалардың жуынатын бөлмелерінде 200 литрлік 2 данадан аристондар орнатылған, яғни әр душқа 400 литрлік аристон арқылы жылу су беріледі» деп ақпарат жолдаған болатын.
