Сотпен не анықталды:
Ж.С. 2023 жылғы 29 мамырда сағат 03:30 шамасында өзінің үйіне інісі Б.С.-тың масаң күйде келгеніне ашуланып, спирттік ішімдікті тұтынуды доғаруды айтқан, осы кезде інісі Б.С. оны балағаттап, екеуінің арасында жан-жал туындаған.
Осыдан кейін Ж.С. адам қазасы түрінде қоғамға қауіпті зардаптың туындауын алдын-ала біліп және соны қалап, өз әрекетінің осындай нәтижесіне саналы түрде жол беріп, аталған үйдің ас бөлмесіне кіріп, ыдыстар тұратын шкаф ішінен асханалық пышағын өзімен бірге алып, онымен қаруланып, аталған үйдің қонақ бөлмесінде інісі Б.С.-тың кеудесіне, құрсақ қабырғасына және денесіне бірнеше рет аталған пышақпен соққылар жасаған. Нәтижесінде, көптеген қан кетумен, сондай-ақ сыртқы қан кетумен ауыр дене зақымы келтіріліп, соңғы оқиға болған жерде қаза болған.
Тараптардың позициясы:
Прокурор сотталушы Ж.С.-қа 9 жылға бас бостандығынан айыру түріндегі жаза тағайындауды сұрады.
Сотталушы Ж.С. жасаған іс-әрекетіне шын жүректен өкінеді, тағылған айып бойынша қасақана қазаға ұшырату деген бөлікпен келіспейді, себебі Б.С.-ты өлтіру пиғылы болмаған, барлығы кездейсоқ болған, сондықтан жеңіл жаза тағайындауды сұрады.
Дәлелдемелер бойынша:
Жасаған іс-әрекеті тергеп-тексеру амалдары жүргізілу барысында толтырылған процессуалдық құжаттармен, сараптамалардың қорытындыларымен, куәлердің жауаптарымен және басты сот талқылауында зерделенген қылмыстық істің процессуалдық өзге де материалдарымен дәлелденді.
Сот шешімі:
Қылмыстық жауаптылық пен жазаны жеңілдететін мән-жайлар ретінде, сот оның оның іс әрекетіне шын жүректен өкінетіндігін, қарт анасының барын, тұрғылықты жерінен жақсы жағынан мінезделетінін, жәбірленушінің сотталушыға кешірім бергенін таныды.
Қылмыстық жауаптылық пен жазасын ауырлататын мән-жайлар анықталмады.
Сот үкімімен ҚК-нің 99-бабының 1 бөлігі бойынша Ж.С.-қа қылмыстық-атқару жүйесінің қауіпсіздігі орташа мекемесінде жазасын өтей отырып, 9 жыл мерзімге бас бостандығынан айыру жазасы тағайындалды.
Үкім заңды күшіне енді.
