Сот отырысының хатшысының жұмысы күрделі, көп салалы, сөйте тұра қызықты да. Сот процесінде қатысушылардың айтқан сөздерін хаттамаға түсіріп қана отыратын сияқты. Алайда, сот процесінің дұрыс ұйымдастырылуы, іс бойынша өзіндік айғақ саналатын сот құжаттарының, сот отырысы хаттамасы дұрыс, нақты, сауатты толтырылуы осы хатшыға байланысты.
Судьялардың қызметін қамтамасыз етуде маңызды рөлді сот отырысының хатшысы атқарады. Хатшы, сонымен қатар, тараптардың сот отырысына келуін қамтамасыз етіп, істерді рәсімдеп, сот атілері мен басқа да құжаттарды іс жүргізу нұсқаулығына сәйкес жүргізеді. Соттың жұмысы мен беделі көп ретте сот отырысы хатшысының жұмысты дұрыс ұйымдастыра білуіне, жауапкершілігіне, біліктілігі мен ұқыптылығына байланысты. Маман азаматтармен сыпайы сөйлесіп, шағым тудырмас үшін азаматтардың сауалдарына уақытылы жауап беріп отыруы тиіс.
Судьяның уақытты тиімді пайдаланып, өнімді жұмыс жасауы сот отырысы хатшысының біліктілігіне, іскерлігіне, тындырылымдығына тікелей байланысты. Әрине, сот отырысында әртүрлі істер қаралады. Заңның да әр түрлі баптары қолданылады. Қылмыстық істер, даулар сотта қаралып, соңғы түйін осында шығарылып жатады. Міне, осының барлығын көзімен көре жүріп, мол тәжірибеден өтіп, білімін жетілдіреді.Соңында өз мамандығын жетік біліп шығады. Себебі, бұған бұл салада жүргізілген реформалар өзінің оң нәтижесін беруде.
Мемлекет қызметкер мәртебесін қолдап отыру үшін барлық мемлекеттік қызметкерлер секілді сот отырысының хатшыларына да қойылатын талаптар әрдайым жоғарылап, соттың іс жүргізуге қатысты ішкі тәртіптері ішінара өзгеріп отырады. Ауыртпалыққа қарамастан, сот отырысының хатшылары өз міндеттеріне мұқият, атқарушы және жауапкершілікпен қарауы керек.
Соттың жұмысы мен имиджі сот отырысы хатшысының дұрыс ұйымдастырылған жұмысына, оның жауапкершілгіне, сауаттылығына байланысты. Сот отырысының хатшысы сот жүйесіндегі маңызды буын екендігі сөзсіз.
Жамбыл облысының қылмыстық
істер жөніндегі мамандандырылған
ауданаралық соты әкімшісінің
бас маман-сот отырысының хатшысы Қ.Мутан
