Жамбыл облысы ТЖД «Өрт сөндіру және авариялық-құтқару жұмыстары қызметі» ММ Тараз қаласы №2 мамандандырылған өрт сөндіру бөлімі бастығының уақытша міндетін атқарушы азаматтық қорғау капитаны Аширбаев Жақсылық Мұратбекұлы Нұр-сұлтан қаласына арнайы шақыртумен барып, Қазақстан Республикасы Тәуелсіздігінің 30 жылдығына орай жарияланған «Жастар Отанға» жүлдесінің «Жылдың жас қаһарманы» аталымы бойынша иегері атанып, «Нұр Отан» партиясы төрағасының бірінші орынбасары Бауыржан Қыдырғалиұлы Байбектің қолынан арнайы дипломмен және қаржылай марапатталды. Айта кеткен жөн, ол ағымдағы жылдың тамыз айында Байзақ ауданында орын алған жарылыс салдарынан зардап шеккендердің бірі болып табылды.
Жақсылық Мұратбекұлы Аширбаев 1994 жылы Тараз қаласында туылған. Ол 2012-2016 жылдар аралығында ҚР ТЖМ Көкшетау техникалық институтын аяқтаған. 2016-2017 жылдары Алматы облысы, Қарасай ауданындағы өрт сөндіру бөлімінде қарауыл бастығы, 2017-2020 жылдары Тараз қаласы №15 мамандандырылған өрт сөндіру бөлімінде аға инженер лауазымдарында, ал 2020 жылдан қазіргі уақытқа дейін Тараз қаласы №2 мамандандырылған өрт сөндіру бөлімі бастығының орынбасары лауазымында қызмет атқаруда. Отбасылы. Үш қыз тәрбиелеп отырған өнегелі отбасы. Біз өз тарапымыздан Жақсылықтың қызметіне табыс тілеп, жүлдесімен құттықтаймыз.
Жамбыл облысы ТЖД Өрт сөндіру және авариялық-құтқару жұмыстары қызметінің Қоғаммен байланыс тобы
