Жамбыл облысы әкімдігінің табиғи ресурстар және табиғат пайдалануды реттеу басқармасының мәліметінше Жамбыл облысындағы мемлекеттік орман қорының жалпы көлемі бүгінгі таңда 4,4 млн. га (30,8%), оның орман ағаштары көмкерген жерлері 2,4 млн.га (15,47%) құрайды. Жыл сайын мемлекеттік орман қоры аумағындағы 5000 га жуық жерге орман ағаштары көшеттен және тұқымынан егілді. Мемлекет басшысының Жолдауына сәйкес, Жамбыл облысының орман қоры жеріне 140 млн. түп ағаш отырғызылады (Республика бойынша 2 млрд.). Ағымдағы жылғы көктемде 3100 га жерге 6,1 млн. түп ағаш көшеттері отырғызылды, 4000 гектарға сексеуіл тұқымын (20 мың кг) себу күз айына жоспарланған. Өзімізді егілетін көшеттермен қамтамасыз ету үшін қарағаш (26 га), сексеуіл (160 га), қылқан жапырақты ағаш (1,5 га) көшеттерін өсіруге тұқымбақтар саны 49 га-дан 187,5 га арттырылды. Жоспар бойынша бұл 2022 жылы -13290 мың га, 2023 жылы -15650 мың га болмақ. Алынатын көшет материалдары жылына 36,1 млн. дананы құрайды деп күтілуде. 
Ағымдағы жылы Байзақ орман шаруашылығы мекемесі орман қорында 1 орман өрті оқиғасы тіркеліп, өртенген аумақ 255,1 га құрады. Биыл қосымша 6 найзағай отын бұру нысандарын және 6 өрт бақылау мұнараларын мекемелерге орнату жоспарланған. Климаттық зоналарда және мемлекеттік орман қоры жерлерінде сынақтан өткізілген «Орман.кз» жаңа геоинформациялық мобильді қосымшасы барлық мекемелерге орнатылды. 2021 жылға орман шаруашылығы мекемелерінің материалдық- техникалық базаларын толық жақсарту бойынша 10 трактор, 8 автокөлік, 8 мотоцикл, Соқа — 9 дана алынып, қалған техникалар тамыз-қыркүйек айларына беріледі.
Мемлекеттік орман қоры учаскелеріндегі жайылымдыққа 1556 пайдаланушыға орман билеті беріліп, жергілікті бюджетке 48,5 млн. теңге қаражат түсті.2021 жылдың 6 айында мемлекеттік орман қоры мен аңшылық алқаптарда 347 рейдтер жүргізіліп, аң аулау ережесін бұзу, балық аулау және балық қорларын сақтау ережелерін бұзу, орман заңдылықтарын бұзу фактілері бойынша 294 хаттама толтырылды. Сонымен қатар, Мамандандырылған «Сапсан» жедел қызметімен 86 рейдтік іс-шаралар жүргізіліп, нәтижесінде 77 әкімшілік хаттама толтырылған.
Материал Жамбыл облысы әкімдігінің ішкі саясат басқармасының тапсырысы бойынша дайындалды
