Ағымдағы жылдың маусым-шілде айларында күннің аптап ысуы кезеңінде Жамбыл облысында аса қауіпті жұқпалы ауруларды тасымалдаушылар мен қоздырушылардан зардап шеккен (кенелер, кеміргіштер, қандалалар және т.б.) 2 жағдай тіркелді. Мәселен, бүгінге дейін Талас ауданында сібір жарасының 2 жағдайы тіркелді.
Өңірде 257 адамды кене шағып, олар медициналық көмекке жүгінген. Оның 159-ы — 14 жасқа дейінгі балалар. Алайда, бұл өткен жылдың осы кезеңімен салыстырғанда, 1,5 есеге аз болғанымен, әрбір тұрғын жеке бастың сақтық шараларын сақтауды есінен шығармауы тиіс.
Кене шағу бойынша биыл Тараз қаласының аумағында — 143, Байзақ ауданында — 29, Сарысуда – 28, Мойынқұмда – 15, Т.Рысқұлов, Шу, Жамбыл аудандарында — 9, Қордайда – 7, Таласта – 6, Меркіде – 2 жағдайдананықталып отыр. Улы жәндіктен зардап шеккендер 14 күн медициналық бақылауда болуы тиіс. Бүгінде кенеден зардап шеккен 257 адамның 188-і аталған мерзімнің өтуіне байланысты бақылаудан алынды.
Осы жылдың өзінде қора-жайлар мен төрт-түліктен арнайы бригаданың көмегімен 28509 астам жәндік алынып, тексеруге жіберілген. Зерттелген 2595 кененің 52-сінен қырым қанды қызбасының белгілері табылды. Аурудың деңгейін төмендету, эпидемиялық ахуалды күрделендірмеу, дертті дер кезінде анықтап, қатерлі жағдайға жібермей ұстап тұру шараларын жүргізу – тек қана медицина, ветеринария қызметкерлерінің немесе жергілікті әкімшіліктердің жұмыстары ғана емес, оған ошақ аймақтарында тұратын елді-мекендердің тұрғындары да атсалысуға тиіс. Сондай-ақ, кене шаққан уақытта оны өздігінен алып тастауға болмайды, тез арада әрбір тұрғын тұрғылықты мекен-жайы бойынша медициналық көмекке жүгінуі керек, ол жерде кенеден зардап шеккен адамға геморрагиялық қызбаның алдын алу шаралары жүргізіліп, көмек көрсетумен қатар, не істеу керектігі туралы айтылады.
«Бұл аурудың белгілері кене шаққаннан кейін 2-7 күн ішінде білінеді. Науқас адамның дене ыстығы көтеріледі. Басы, буындары қатты сырқырап ауырады. Көзі мен тамағы қызарады, тамаққа тәбеті болмайды»,- дейді мамандар. Сонымен қатар, мұның жұқпалы екенін де естен шығармаған жөн.
Кене шаққан адамдар міндетті түрде екі апта бойы емдеу мекемесінде диспансерлік бақылауда болуы керек. Аталған талаптардың барлығы дерттің қауіптілігін төмендетеді. Сақтанған — сақ болатынын ұмытпайық!
Жамбыл облысы әкімдігі денсаулық сақтау басқармасының баспасөз қызметі
