“TURANINFO.KZ” ақпарат агенттігі тарапынан денсаулық саласы бойынша Жамбыл облысы әкімдігі денсаулық басқармасына, «Міндетті әлеуметтік медициналық сақтандыру қоры» КЕ АҚ Жамбыл облысы филиалына, “СК — Фармация” ЖШС сұрау хаттар жіберілді.
Жамбыл облысы әкімдігі денсаулық сақтау басқармасы ұсынған ақпарат бойынша Жамбыл облыстық мамандандырылған фтизиопульмоноголия балалар санаторийі 7216,7 мың теңге, Жамбыл аудандық орталық ауруханасы «Міндетті әлеуметтік медициналық сақтандыру қоры» КЕ АҚ Жамбыл облысы филиалына айыппұл соммасы 5 млн теңгеге жуық, Жамбыл облыстық “Ана мен баланы аялау” орталығы 8655,4 мың теңге, Жамбыл облыстық көпбейінді аурухананың қарызы 1 млрд 271 млн теңгені құрады.
Қарызға белшесінен батқан Жамбыл облыстық көпбейінді аурухананың бас дәрігері Абай Нұржанов қызметінен айырылып қалып, орнына міндетін атқарушы болып Қайрат Жетібаев тағайындалған болатын. Қарыздың ең көп мөлшері 1,1 млрд теңге дәрі дәрмектерге, қызмет түрлеріне 23 млн, тауарлар алу бойынша 2 млн, коммуналдық қызметтерге 44 млн қарыздары жиналып қалыпты.
Айта кеткен жөн, 2020 жылы медициналық мекемелерді біріктіру жұмыстары жүргізілді. Жамбыл облыстық көпбейінді ауруаханаға Әйтиев көшесінде орналасқан Жамбыл облыстық аурухана, перинаталдық орталық және онкологиялық аурухана кіреді.
«Міндетті әлеуметтік медициналық сақтандыру қоры» КЕ АҚ Жамбыл облысы филиалы жауабы:
2020 жылдың 1-қаңтарынан бастап Қазақстан Республикасында көрсетілетін медициналық қызметтер тұрғындарға көрсетілетін тегін медициналық көмектің кепілдендірілген көлемі және міндетті әлеуметтік медициналық сақтандыру шеңберінде көрсетілуде. «Әлеуметтік медициналық сақтандыру қоры» коммерциялық емес акционерлік қоғамының Жамбыл облысы бойынша филиалымен Жамбыл облысы бойынша 68 қызметтер берушімен медициналық қызмет көрсетуге шарт жасалды, оның ішінде 88 шарт тұрғындарға көрсетілетін тегін медициналық көмектің кепілдендірілген көлемі, 88 шарт міндетті әлеуметтік медициналық сақтандыру шеңберінде.
Қор филиалы пациенттерге көрсетілген медициналық көмектің сапасына мониторинг жүргізеді.
Нәтижесінде 2020 жылдың қортындысы бойынша 62203 ақау анықталып, жалпы айыппұл сомасы 639 254 581 тенгені құрады.
Ақаулар келесі медициналық көмектің түрлері бойынша анықталған:
— стационарлық көмек түріндегі мамандандырылған медициналық көмек (тәулік бойғы стационар) — 1992 ақау, айыппұл сомасы 118 933 000 теңге;
— консультациялық-диагностикалық қызметтер – 49 377 ақау, айыппұл сомасы 105 484 000 теңге;
— амбулаториялық–емханалық көмек — 3274 ақау, айыппұл сомасы 46 193 000 теңге;
— ауыл тұрғындарына стационарлық көмек — 3192 ақау, айыппұл сомасы 99 350 000 теңге;
— стационарды алмастыратын медициналық көмек түріндегі қалпына келтіру емі және медициналық оңалту — 386 ақау, айыппұл сомасы 95 676 000 теңге.
Ал, медициналық мекемелердің (оның ішінде жекеменшік медициналық мекемелер) арасында қай мекемеге неше айыппұл салынғандығы жөнінде ақпаратты ұсыну мүмкін емес екендігін хабарлаймыз. Себебі Қор филиалы мен медициналық көмекті ұсынатын медициналық ұйымдар (жеткізушілер) арасында жасалған келісім шарт негізінде, бұл ақпарат құпия болып саналады (аталған ақпаратты алу Қазақстан Республикасының 1994 жылғы 15 қыркүйектегі № 154-XIII «Жедел-iздестiру қызметi туралы» Заңының 6 бабы, 10 бабының 1 тармағына сәйкес, Жедел-iздестiру қызметiн жүзеге асыратын органдар тарапынан жедел-iздестiру шараларын жүргiзу негiздерiнде жүзеге асырылатынды).
“СК — Фармация” ЖШС барлық ақпаратты құпия сақтайды екен.
