Видеода ауыл тұрғыны Берік Қалиев “Кімге мұңымызды айтатынымызды да білмей қалдыққой. Құзырлы органдарға хат жіберген болатынбыз. Олар келіп тексеріп қараймыз деген болатын. Бірақ жасалмай жатыр. Қыс мезгілінің де уақыты алыс емес. Күн суытып бара жатыр. Мына көпірдің түрі мынау. Ауылымызда 58 м — лік өте ыңғайлы көпір бар еді. Халық ыңғайлы келіп өтіп жүрген. Алайда ол көпірді алып тастады. Ол көпірдің материалын қайда жібергені белгісіз осы бір көпірді әкеліп орнатты. Проектаға сай деп айтылды. Дегенмен де бұл көпір ауыл тұрғындарына қиындық алып келіп жатыр. Біріншіден — бұл көпір тіке қойылған. Бұрылып бару мүмкін емес. Екіншіден — өте биік. Үшіншіден — өте тар, 4 метр. Бір көліктің өзі әрең жүреді. Көріп тұрғандарыңыздай екі жағы топырақпен толтырылған. Жауынды күні балшық, лай болары анық. Бәріміз тайғанап құлаймыз. Ал қыста тайғанақ, мұз болады. Біріміз тағыда сырғанап құлайтынымыз анық. Жән-жағы да көріп тұрғандарыңыздай өте қауіпті. Бір жағы арық, бір жағы сай. Қазір міне анық көрсетейін. Міне менің астымда жеңіл көлік. Міне мынау төпырақ енді адам айтқысыз. Бұл жерден мен өзім өте сақтықпен өтемін. Себебі көліктің асты тиеді. Міне осылай жәй өтеміз. Өте сақтықпен. Жақында ғана мынау тұрған ауылдың қисайған көрсеткіші ғой. Осыны үлкен көлік келіп соққан болатын. Бірақ соғылудың көкесі әлі қыста болады. Анау тұрған үлкен тіректерге барып соғыламыз. Жаздың өзінде соғылған. Көпірден түрскен бетті тез бұрылмасаң осындай тіректерді соғу қауіпі жоғары. Ал енді ұзын көліктер өте алмасы анық. Амал жоқ соғысады. Міне Жамбыл облысы, Бәйтерек ауылы осы. Алматы-Ташкент трассасындағы ауыл. Біз осындай күй кешіп жатырмыз ағайын!” деп ауылдастарының мәселесін жолдаған болатын

Орын алған мәселе бойынша Қаратөбе ауылдық округінің әкімі Қайрат Жатқанбаевқа хабарласқан болатынбыз

Қаратөбе ауылдық округіне қарасты Бәйтерек ауылының тұрғандарының өтінішін (қанағаттандыру) зерделей келе, Тәуке каналынан өтетін жаңа көпірдің құрылысы автокөлік ауыр техника, ауыл шаруашылық техникасы, автобус өте алмайды. Сонымен қатар, жаяу жүрушілер өткелінде, оқушылар мен ересек адамдардың өтуіне қауіпсіз жағдайы тудырмауда. Ауылға келетін көпір болғандықтан кеңейтіп соғып беруін сұраған болатын. Ол туралы 22.09.2020 жылы хат жолданған болатын. «Тәуке» каналында жүргізілген жөндеу жұмыстары барысында егістіктерді сумен қамтуға қажетті емес жерлерге шлюз қойылған, ал қажетті жерлерге қойылмаған. Канал табанына төселген төсемшелерді стандартқа сәйкес келмегендігінен су ағысымен шайылып кетіп жатыр — деп мәлімдеді ауылдық округ әкімі.

Видео жарық көргеннен кейін Жамбыл ауданы әкімінің баспасөз хатшысы Ақжігіт Жетпісбай “Жамбыл ауданы әкімдігінің баспасөз қызметінен жарияланған бейнеролик бойынша ақпараттандырып отырмыз.

Қаратөбе ауылдық округіне қарасты Бәйтерек елді мекенінің белгісі жазылған көрсеткішті жергілікті әкімі аппаратының қызметкерлері жаңа нұсқасын дайындап қойған. Ал көпір бойынша, апта үшінде «Казсушар» мекемесі мен жауапты мердігерлер осы орында кездесу үйымдастырып, мәселені шешу жолдарын қараша халыққа хабарлайтын болады. Хабарлама бойынша пікірлер айдарына тағыда қайырылатын боламыз” деген пікір қалдырды.

Мән-жайдың анық қанығын білу үшін “Қазсушар” РМК Жамбыл облысы бойынша филиал басшысы Қазыбек Бедебаевқа телефон арқылы хабарласқан болатынбыз.

Осыдан 1 ай бұрын ауыл тұрғындары маған келген. Жобаны өзгертіп, екі көлік сиятындай ыңғайлы етіп беріңіздер деп өтінген болатын. Бас инженерге тапсырма берілді. Бірақ өкінішке орай менің тапсырма берген жұмысшым жұмыстан шығып кетті. Және ол мәселе де қалып кетіпті. Кеше ғана мердігерге тапсырма берілген болатын. Халыққа қалай ыңғайлы солай жасап беретін боламыз. Көпір соғып беру ол абзал әрекет. Өзіміздің есебімізден болса да қосып, жөндеп береміз деді ол кісілер. Шамамен 10 күннің ішінде аяқталады. Уайымдаудың еш қажеті жоқ деген болатын.

Айта кетерлігі, қайта жаңғырту жұмыстарына Еуропалық қайта құру және даму банкінің несиесі арқылы 26,158 млрд.теңге сомасына 5 объектінің құрылыс-монтаждау жұмыстары жүргізілуде.

Осы мәселені ауыл тұрғындары әлеуметтік желіге шығармағанда жауапты басшылар тым-тырыс отыра беретін секілді. Бұл мәселені біздің де ақпарат агенттігі өз бақылауында ұстайтын болады.

TURANINFO.KZ