Тараз мемлекеттік педагогикалық университетінде «JaStar.kz» Студенттерге қызмет көрсету орталығының ашылу салтанаты өтті. «Цифрлық Қазақстан» бағдарламасы аясында инновациялық технологияны пайдалану және дамыту негізінде құрылған Орталықтың негізгі саясаты – білім алушыларға «Бір терезе» ұстанымы бойынша сапалы әрі жылдам қызмет көрсетуді қамтамасыз ету. Электрондық қызмет көрсету жүйесінің негізінде құрылған орталықтың басты міндеттеріне студенттерге қажетті ақпараттармен анықтамаларды қысқа мерзім ішінде беру жүктелмек. Олардың қатарында жоғары оқу орнында білім алу фактісін растайтын құжат, шәкіртақы алу туралы анықтама, студенттік билет көшірмесін алуға сұраныс тапсыруға, Жатақханаға орналастыру жөнінде өтінішті және өзге де қызметтерді сандық технологияның көмегімен орындауға мүмкіндік береді. Жастарға қызмет көрсетуге бағытталған орталықты толығымен жабдықтап, қажетті гаджеттермен қамтамасыз етіп, демеуші болған «Сбербанк» АҚ Тараз қалалық филиалының директоры Дәурен Ақшалов орталықтың ашылу салтанатына арнайы келді.
Шараға жиылған қонақтартың қатарында ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің төраға орынбасары Шаимова Айгүл Амантайқызы және ҚР Білім және ғылым вице-министрі Асылова Бибігүл Амангелдіқызы, «Нұр Отан» партиясы Жамбыл облыстық филиалы төрағасының бірінші орынбасары Манжуов Ерқанат Нұрбапаұлы, Жамбыл облысы әкімдігінің білім басқармасының басшысы Тұрмаханбетова Рахия Сейтбекқызы, Тараз қаласы әкімдігінің білім бөлімінің басшысы Жинақбаева Мубарак Қасымқызы, ТИГУ ректоры Саурықов Ерболат Байзақұлы ашылу рәсіміне қатысты. ҚР Мемлекеттік қызмет істері және сыбайлас жемқорлыққа қарсы іс-қимыл агенттігі Жамбыл облысы бойынша департаментінің басшысы Мақсұт Ыбырайханұлы студенттер өздеріне қажетті ақпараттардың барлығын ашық түрде, компьютерлік бағдарлама арқылы жүзеге асыруы, уақыт үнемдеп, жұмыс барысын жылдамдатып, сыбайлас жемқорлықтың орын алуы мүмкін көріністерін түп тамырымен жоятынын тұсы да еленуге тұрарлық ілгерілеу екенін атап өтті.
Сонымен қатар, қонақтар «Жүсіп Баласағұн» атындағы мұражайымен танысып, «Адалдық дүкенінің» ресми ашылуына қатысты.
TURANINFO.KZ
