Бүгін ОКҚ алаңында сарапшылар брифингі өтті. Брифинг барысында дәрігерлер «Омикрон» штамын жұқтырған кездегі ауру ағымының ерекшеліктері туралы айтып берді.
«Бүгінгі таңда СOVID-19 клиникалық ағымында пандемияның басындағымен салыстырғанда айырмашылық бар. Ең алдымен, «Омикрон». штамын жұқтырғанда, инкубациялық кезең 2-4 күнге дейін қысқарды. Бұл штамм қазір біздің елімізде басым болып тұр», – деп мәлімдеді Министрліктің бас штаттан тыс инфекционсті Бақыт Көшерова.
Егер бұрын пневмония салдарынан тыныс алудың қиындауына ауырлық деңгейінің анықтауыш критерийі ретінде қарасақ, қазір пациенттердің жай-күйіне интоксикация белгілері, қабынулар мен асқынулар, созылмалы аурулар себеп болуы мүмкін.
«Аурудың орташа ауыр және ауыр ағымының өршуі адамның өкпесі қағынбай-ақ, интоксикация белгілері, қандағы және су-электролит мөлшеріндегі және басқа да бұзылыстар салдарынан болуы мүмкін. Сондықтан аурудың ауырлық деңгейін тек дәрігер ғана анықтай алады», – деп атап өтті Бақыт Көшерова.
Балалар арасындағы КВИ ағымының ерекшеліктері туралы Министрліктің бас штаттан тыс балалар инфекционисті Динагүл Баешева айтып берді.
«Осы айдың 11 күнінде КВИ-ге шалдыққан балалар арасында ауруханаға жатқызылу жиілігі 29,8%-ға азайды. Қазір 308 бала стационарда ем алып жатыр. Олардың ішінде алтауы – ауырлық дәрежесі орташа инфекция жұқтырған жаңа туған сәбилер (Алматы, Қарағанды, Жамбыл, Қызылорда (2), Солтүстік Қазақстан облыстарында), ал 302-сі – туғанына 28 күннен асқан және 18 жасқа дейінгі балалар», – деп мәлімдеді Динагүл Баешева.
Сарапшының айтуынша, аурудың ең бірінші толқынында балалардың жас құрамында 5-тен 12 жасқа дейінгі балалар басым болатын, олар жалпы науқастар санының 30%-ын құрайтын. Қазір аурудың басқа жастағы балаларға да біркелкі таралғанын көріп отырмыз. Бұл вирустың отбасы ішінде таралып жатқанын білдіреді.
Нұр-Сұлтан қаласы Көпбейінді медициналық орталығы басшысының инфекциялық қызмет бойынша орынбасары Татьяна Цечоева жансақтау бөлімінде жатқан және қарқынды терапияны қажет ететін науқастардың жай-күйі туралы баяндап берді.
Оның айтуынша, науқастардың жай-күйінің ауырлығы коронавирус инфекциясының ауыр ағымынан емес, денсаулығындағы кінәраттарынан, қосақталған созылмалы патологиялардың әсерінен болып отыр. Яғни, олар жүрек-қантамыр жүйесінің бүлінуі, қант диабеті, қатерлі ісік, жүйелік аурулар, ағзадағы иммунитеттің тапшы жағдайы.
Брифинг қорытындысында сарапшылар халықты КВИ-ден қорғау үшін негізгі сақтық шараларын сақтауға кеңес берді. Сондай-ақ аурудың жеңіл ағымын қамтамасыз етіп, асқыну мен ауыр жағдайды болдырмау үшін вакцинацияның маңыздылығын атап өтті.
Қазіргі таңда МСАК ұйымдарында коронавирус инфекциясын жұқтырған 95% аса науқас ем алып жатыр. Емханалар фильтр кабинеттерін, санитарлық-дизинфекциялық және эпидемологиялық режимді қамтамасыз етіп, қалыпты жұмыс істеуде.
КВИ бойынша стационарлық көмекті республика бойынша жалпы қуаты 5361 төсек-орынға есептелген 200 инфекциялық аурухана көрсетуде. Төсек-орындардың толуы 22% (1201 төсек) құрайды. Ал жансақтау бөліміндегі төсек-орындардың толуы 6% (656 төсек-орынның 39-ы) құрайды.
КВИ жұқтырған пациенттерге уақытылы медициналық көмек көрсету үшін МСАК деңгейінде 2387 мобильді бригада ұйымдастырылған. Олардың 1010-ы ауылда, резервте 1610 мобильді бригада бар. 2022 жылдың 7 айында мобильді бригадалар 899 669 шақыруға барды. Бұл 2021 жылдың ұқсас кезеңімен салыстырғанда, 1,7 есе аз.
