“ Ұлы дала өркениеттері” байқауы: Талант – табиғаттан, талап өзіңнен

Қазақстан Республикасы Ақпарат және қоғамдық даму министрлігі, «Азаматтық бастамаларды қолдау орталығы» коммерциялық емес акционерлік қоғамының «Ұрпақтар сабақтастығын және Қазақстан халқының дәстүрлерін танымал етуді қамтамасыз ету жөніндегі шаралар кешенін іске асыру» мемлекеттік гранты аясында «Жамбыл облысы жастар ұйымдарының Қауымдастығы» заңды тұлғалар бірлестігі орта білім беру ұйымдары арасында өткізіліп жатқан “ Ұлы дала өркениеттері” атты байқауына орта білім беру ұйымдары белсене қатысып жатыр.

Өткізіліп жатқан іс шаралар өскелең ұрпақты Қазақстан халқының мәдениетін, ана тілін, ұлттық дәстүрлерін сақтауға және дамытуға, дәстүрді жаңғырту және дамыту мәселелеріне, ұлттық және мәдени бірегейлікті сақтауға, сондай-ақ жастарды өз халқының мәдениетіне, халық шығармашылығына жанашыр болуға тартуға өз септігін тигізіп жатыр.

«Ұрпақтар сабақтастығын және Қазақстан халқының дәстүрлерін танымал етуді қамтамасыз ету жөніндегі шаралар кешенін іске асыру» мемлекеттік гранты аясында «Жамбыл облысы жастар ұйымдарының Қауымдастығы» заңды тұлғалар бірлестігінің ұйымдастыруымен Бірінші мамыр жалпы орта білім беретін мектеп оқушылары «Талант – табиғаттан, талап өзіңнен» тақырыбында Төлеби ауданы Ақайдар ауылының тұрғыны, ою ойып, құрақ құрау ісінің хас шебері Ерахан Алтынай Жұмабайқызымен кездесті.

Таңғажайып өнерімен талайларды тамсандырған қазақ қолөнерінің бірі – қиыстырып құрақ қию, одан көздің жауын алатындай өте бағалы бұйымдар жасау. Оның қымбат құндылығының айғағы құрақтан жасалатын заттардың ұзатылған қыз жасауына еніп, дүние-мүліктің ажарын ашып, үй ішіне ұлттық рең беріп, адамның рухын асқақтататыны. Қазіргі таңда құрастырылған киім үлгілерін авангард стильінде пайдаланылып келеді. Орта Азия халықтары қазақ пен қырғызда – құрақ, Ресейде – мозайка немесе ляпочка деп, ал ағылшынша квилт деп, Жапонша сашико деп аталып келеді.

Құрақ – төрге төсейтін көрпеше. Мата қиындыларын қиюластырып, тұмарша, құдық, ромб, сегіз жапырақ тәрізді түрлі өрнектерден құралады. Қазақтың ісмер, шебер аналары құрақ көрпеден құрақ кеудешеге дейін, құрақ бөстектен құрақ ойыншыққа дейін жасаған. Зердесінде зейіні бар адамдардың құрақтан жасалған заттарға ойлы көзбен қараса, сан алуан сәнді түстердің бір-бірімен жарасым тауып, әдемілік әлемін сыйға тартып тұрғанын аңғара алады. Ол арқылы халқымыздың құнарлы дүниетанымын, эстетикалық талап-талғамын, сұлулықты аңсаған іңкәр сезімін айтқызбай-ақ танисың. Құрақ құрау қыздарды төзімділікке, үнемділікке, шеберлікке, бояуларды ажыратып,олардың бір-бірімен үйлесімділік табуын түсініп, әсемдікке үндейді, жан-дүниесін байытып, ой-өрісін кеңітеді. Яғни, құрақ құрауда қойылатын басты шарт: онымен айналысатын адамның бойында өнерді түсінетін қасиет, ұшқыр қиял, бояулардың сырын білетін таным болуға тиіс екенін түсіндіре білді Алтынай Жұмабайқызы.

Байқауға “Орта білім беру ұйымдары арасында өткізілетін «Ұлы дала өркениеттері» атты байқауы аясында 138 білім беру ұйымы өтінім берді. Айта кетейік, байқаудың жүлде қоры 1 800 000 (бір миллион сегіз жүз мың) теңгені құрайды. Сыйлықақы бағалау талаптарына сай ең жоғары ұпай жинаған үш ұйымға беріледі. І орынға бір миллион теңге, ІІ орынға бес жүз мың теңге, ІІІ орынға үш жүз мың теңге қарастырылған.