Жамбыл облысы әкімдігі ішкі саясат басқармасы «Өңірлік коммуникациялар қызметінің» алаңында Жамбыл облысы әкімдігінің мәдениет, архивтер және құжаттама басқармасының басшысы Дүйсеналы Бықыбаевтың қатысуымен баспасөз конференциясы өтті. Дүйсеналы Дыбысалыұлы ұлтымыздың рухани мұрасы мен мәдениетінің заман талабына сай өркендеуіне жол ашатын жобалар туралы баяндап, журналистердің сұрақтарына жауап берді.
Елбасының «Рухани жаңғыру» бағдарламасы және «Ұлы даланың жеті қыры» мақаласы негізге алынып, 2019 жылдан бастап жаңа тың жобалар қолға алынып отыр. Олар:
1. «Жамбыл — менің жай атым, Халық — менің шын атым» Республикалық ақындар айтысы;
2. «Әулиеата бояулары» І-ші халық шығармашылығы фестивалі;
3. «Ғибратты өнер керуені» мәдени-әлеуметтік жоба;
4. Облыстық «Taraz симфониясы» классикалық өнер фестивалі;
5. «Талас толқындары» атты І-ші облыстық музыкалық өнер фестивалі;
6. «Көне Тараз күмбірі» атты І-ші Республикалық этно-фольклорлық фестиваль.
Сонымен қатар, биылғы жылдан бастап облыстың тарихы мен рухани мұраларына арналған тарих және шығармашылық бағытта «Тараз кітапханасы» сериясымен көп томдық кітаптар жинағын шығару жұмыстары қолға алынды. Аталған жобаның мақсаты Әулиеата өңірінен шыққан рухани дүниелерді, олардың авторларын, яғни ұлт перзенттері мен ақын-жыршы, батырлардың есімін ұрпақ жадында жаңғырту, ғылыми еңбектерде, газет-журналдарда, архивтерде сақталған әдеби құндылықтарды қайта парақтап, қалып бара жатқан мәдени мұраларды (жыр-дастан, айтыстар т.б.) кітапқа енгізу. Биылғы жылы облысымыздың 80 жылдығына орай көптомдықтың 80 томы шығады.
1. «Жамбыл – менің жай атым, халық – менің шын атым!» атты республикалық ақындар айтысы. Республикалыүнһһқ ақындар айтысының іріктеу кезеңдері қаңтар-ақпан айларында облысымыздың әр аймағында өтті. Айтыс өнеріне бейімі бар оқушылар мен жастар ауылдық округтерде іріктеліп, суырып салма қасиеттері байқалған ақындар аудандық кезеңіне қатысып, үздік деп танылғандары жалпы саны 31 ақын облыстық ақындар айтысына қатысты. Республикалық кезеңге жолдама алған жеңімпаздарға Ахметжан Өзбеков, Айтмұханбет Исақов, Ербол Қамбатыров сынды елімізге танымал ақындар өз мектептерін ашып, шеберлік сыныптар ұйымдастырып, айтыстың ақтық кезеңіне жан-жақты дайындауда. Республикалық ақындар айтысы 2019 жылдың 28 ақпанынан 3 сәуірге ауыстырылды. Бас байгеге автокөлік және жүлделі орындарға ақшалай сыйлық қарастырылып отыр. Айтыстың жүргізетін ақын, Қазақстанның Еңбек сіңірген қайраткері Жүрсін Ерман. Айтысқа кіру тегін.
2. «Әулиеата бояулары» атты І-ші халық шығармашылығы фестивалі
Аталған фестиваль «Өз жеріңді танып біл» жаңа бастамасы аясында облысымыздың әсем жерлері мен көркем табиғатын, тарихи орындарын фото және пейзаж тілінде сөйлетуге бағытталған. Онда «Жамбыл облысының тарихы», «Жамбыл облысының табиғаты» тақырыптары қамтылады.
Фестивальдің номинациялары:
Бейнелеу өнері оның ішінде (живопись, графика, мүсін, сәулет өнері, натюрморт, портрет, пейзаж)
Сәндік қолданбалы өнер (ағаш, сүйек, тері бұйымдары, зергерлік өнер, гобелен т.б).
Фотосурет
Қолөнер мен фотосурет номинациялар бойынша барлық ауыл-аймақтарда 2019 жылдың сәуір-мамыр аралығында көрме өткізіліп, іріктелген туындылардан 10-18 мамыр аралығында аудандық көрме ұйымдастырылады. Аудандық көрмелерде үздік деп танылған туындылардың авторлары облыстық кезеңге жолдама беріледі. Облыстық кезең Тараз қаласының Тұңғыш Президент саябағында 24 мамыр күні ұйымдастырылады.
3. Облыстық «Taraz симфониясы» өнер фестивалі. Фестиваль «Аспапта орындау»(саксофон, баян, аккордеон, фортепиано, гитара, соқпалы аспаптар) және «Вокал» номинациялары (классика-романс, джаз, эстрада) бойынша 4 кезеңде өтеді. І кезең — 2-12 сәуір аралығында ауылдық жерлерде іріктеу жұмыстары жүргізіледі. Өнер мектебіндегі балалар мен өнерлі жастар арасында тыңдау өткізіп, бейімі бар өнерпаздар аудандық байқауға шақырылады.
ІІ кезең — 15-27 сәуір аралығында әр ауданда ауылдардан іріктеліп келген үміткерлер арасында өтеді. Іріктелген өнерпаздарға әр жанр бойынша тәлімгерлер тағайындалып, 4 ай ішінде өнерпаздармен жұмыс жүргізіледі, өнерлерін жетілдіреді.
ІІІ кезең — 16-28 қыркүйек аралығында тәлімгерлер дайындаған өнерпаздар тағы бір іріктеліп, үздік деп танылғандар облыстық ақтық кезеңге жолдама алады.
ІV кезең — қазан айында Тараз қаласының «Баласағұн» орталық концерт залында өтеді.
Фестивальдің нәтижесінде талантты балалар арнайы оқу орындарын аяқтап сол ауылға тартылатын болады.
