Жарты жыл ішінде облыс соттарының өндірісіне есепті кезең басындағы қалдықтарды қосқанда барлығы 24 288 талап қою түскен. Бұл өткен 2025 жылдың сәйкес кезеңімен салыстырғанда 8 008 арызға көп, яғни сотқа жүгінушілердің қатары бірден 49,2 пайызға дерлік өсіп отыр. Талап қоюлардың мұндай күрт көбеюі әсіресе Байзақ, Жуалы, Талас және Т.Рысқұлов аудандық соттарында қатты байқалады.
Сот мамандары жүргізген арнайы зерделеу жұмыстары арыздардың не себепті қарқынды өскенін ашып берді. Негізгі фактор – халықтың қаржылық жағдайының төмендеуі және банктен алған кредит қарыздарын уақытылы қайтара алмауы. Өңірдегі азаматтардың 99 пайызында кредит қарызы бар екені анықталды. Бұған қоса, соңғы уақытта интернет-алаяқтарының құрығына түсіп, соның салдарынан шығынға батқан тұрғындардың сотқа шағымдануы жиілеген.
Тағы бір басты себеп – елде қабылданған Азаматтардың төлем қабілеттілігін қалпына келтіру және банкроттық туралы заңның күшіне енуі. Бұл заң аясында тұрғындар банктерге төлейтін төлемдерін жеңілдету немесе қарыздан толық құтылу мақсатында сотқа белсенді түрде арыз бере бастаған. Нақты цифрларға тоқталсақ, алты айда банкрот деп тану немесе төлем қабілеттігін қалпына келтіру бойынша 632 арыз түскен, бұл былтырғы кезеңмен салыстырғанда екі еседен аса көп. Ал банктер, факторингтік ұйымдар мен микроқаржы ұйымдарының қатысуымен туындаған даулар бойынша 7 235 талап қою тіркелді. Сонымен қатар алаяқтық салдарынан келтірілген залалды өндіру және негізсіз баю бойынша 761 іс сот қарауына алынған.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
