«Нұр Отан» партиясы Жамбыл облыстық филиалында «Педагог мәртебесі туралы» заң жобасын дайындау бойынша баспасөз конференциясы өтті. Іс-шарада партия облыстық филиалы төрағасының бірінші орынбасары Ерқанат Манжуов «Ұстазым — ұлағатым» акциясының бастау алғандығы туралы айтты.
Елбасы биылғы жылғы Қазақстан халқына Жолдауында экономикадағы, әлеуметтік саладағы, өңірлік дамудағы қысқа мерзімді және ұзақ мерзімді перспективаға арналған іс-қимылдың кешенді бағдарламасын ұсынған болатын.
Жолдаудың әлеуметтік сипаты Елбасы саясатының халықтың әл-ауқатын жақсартып, азаматтардың өзекті мәселелерін шешуге бағытталғанын көрсетеді. Сонымен қатар, Елбасы «Педагог мәртебесі туралы» заңды әзірлеп, қабылдау жөнінде нақты тапсырма берген болатын. Бұл маңызды құжат өз кезегінде мұғалімдердің мәртебесін көтеріп, білім саласының одан әрі дамуына жол ашатыны даусыз.
Бүгіннен бастау алған «Ұстазым-ұлағатым» акциясы аясында 12-25 қараша күндері аралығында арнайы құрылған екі жұмыс тобы жоспарға сәйкес елді мекендерде ұстаздармен кездесулер, қоғамдық қабылдаулар өткізіп, ұсыныстар жинақтайды. Осы уақыт аралығында әлеуметтік желілерде де #Ұстазымұлағатым, #Педагогмәртебесі хэштегтерімен ұсыныстар жинақталады. Әзірленген заң жобасы «Нұр Отан» партиясының ҚР Парламенті Мәжілісіндегі депутаттық фракциясына, Білім және ғылым министрлігіне жолданатын болады.
