Жамбыл облысының Полиция департаменті плацында қысқы киім нысанына ауысуға байланысты полиция қызметкерлерінің саптық байқауы өтті.
Дәстүрлі шараға облыстық Полиция департаментінің барлық жеке құрамы қатысты.
Департамент бастығы Арман Оразалиев полицейлердің нысанды киіміне, қызметтік куәліктердің, жетондардың сәйкестігіне баса назар аудара отырып, жинақылығын тексерді. Арман Молдиярұлы полицейдің сыртқы келбеті әрдайым ұқыпты, азаматтармен қарым-қатынаста сыпайы және әдепті болу керек, сондай-ақ қызметтік міндеттерін орындау барысында білікті қызметкер болуы тиіс деп атап көрсетті.
Саптық байқаулар саптық дайындық дағдыларын нығайтуға, қызметтік тәртіп деңгейін арттыруға ықпал етеді, олар жылына екі рет – көктемде, жазғы киім нысанына көшкен кезде және күзде, қысқы киім үлгісіне көшкен кезде өткізіледі. Өткізілген іс-шара жеке құрам қыс жағдайында қызметке әзір екендіктерін дәлелдеді.
Саптық байқау әскери оркестрдің орындауындағы салтанатты маршпен аяқталды.
Жамбыл облысы Полиция департаменті Баспасөз қызметі
