Жамбыл облысы әкімдігінің білім басқармасы және «Жамбыл дарыны» аймақтық ғылыми-практикалық орталығының ұйымдастыруымен 2024 жылдың 4-5 қаңтар күндері жалпы білім беретін пәндер бойынша республикалық олимпиаданың облыстық кезеңі Тараз қаласы, Қ.Тұрысов атындағы №53 мектеп-гимназиясының базасында өтті.
Жыл сайын Республикалық олимпиада жаратылыстану-математикалық және қоғамдық-гуманитарлық бағытындағы 15 жалпы білім беретін пәндер бойынша 4 кезеңде өткізіледі.
Олимпиаданың мақсаты – оқушылардың шығармашылық қабілеттерін дамыту, теориялық білімі мен тәжірибелік шеберлігін тереңдету, жеке тұлғаның өзін-өзі дамытуына ықпал ету, дарынды балаларды анықтау үшін жағдай жасау, халықаралық олимпиадаларға қатысатын оқушыларды іріктеу.
Олимпиада дәстүрлі форматта өткізіліп, олимпиада тапсырмалары «Дарын» РҒПО интернет ресурсы арқылы әр кезеңнің басында бір уақытта ұсынылады.Олимпиада аяқталғаннан кейін қатысушылардың сканерленген жұмыстары шифрланып, қазылар алқасының мүшелеріне тексеруге жіберіледі. Әрбір кезең аяқталғаннан кейін қатысушылар жұмыстарының сканерленген көшірмелері Жамбыл облысы әкімдігінің білім басқармасының интернет-ресурсында олардың жеке деректерінсіз орналастырылады. Олимпиада тапсырмалары және олимпиаданың дұрыс жауаптары «Дарын» РҒПО сайтында жарияланатын болады.
Республикалық олимпиаданың қорытындысы бойынша жеңімпаздар еліміздің намысын халықаралық олимпиадаларда қорғайтын болады.
