Ұйымның негізін қалаушы әрі басшысы – Сухраб Шаюсупов.
Қордың басты мақсаты – әлеуметтік осал топтар мен мұқтаж жандарға материалдық және рухани қолдау көрсету, қоғамда қайырымдылық мәдениетін дамыту, сонымен қатар балалар, зейнеткерлер және мүмкіндігі шектеулі азаматтардың өмір сүру сапасын жақсартуға бағытталған тұрақты гуманитарлық және әлеуметтік бастамаларды жүйелі түрде жүзеге асыру.
Бүгінгі таңда «Кәусар-Тараз» қоғамдық қоры бірқатар маңызды жобаларды табысты іске асырып келеді. Солардың қатарында ерекше атап өтуге тұрарлығы – «Асар жолы» және «Кең жүрек – мың бала» жобалары. Бұл жобалар аясында өңірдегі әлеуметтік осал отбасылар мен ерекше күтімді қажет ететін азаматтарға үнемі көмек көрсетіліп келеді.
Қордың еріктілері мен қызметкерлері осы уақытқа дейін 100-ден аса азық-түлік себетін мұқтаж отбасыларға жеткізіп берді. Бұл – тек материалдық көмек емес, сонымен қатар жалғызбасты аналар, көпбалалы отбасылар мен уақытша қиын жағдайға тап болған жандарға деген моральдық демеу.
Бұған қоса, «Кәусар-Тараз» құқықтық сауаттылықты арттыруға да мән беріп, түрлі әлеуметтік сұрақтар бойынша, әсіресе eGov мемлекеттік қызметтері арқылы тегін кеңес беру және көмек көрсету қызметін ұйымдастырған. Бұл бастама әсіресе интернет немесе цифрлық технологиямен жұмыс істеуде қиындық көретін егде жастағы адамдар үшін аса пайдалы болды.
Қоғамдық қор тарапынан балалар мен зейнеткерлерге де тұрақты түрде қамқорлық көрсетілуде. Атап айтқанда, қарттар үйінде арнайы концерт ұйымдастырылып, онда 70-тен астам қарияға сыйлықтар тарту етілді. Бұл тек көңіл көтеру емес, сонымен қатар жалғыздықпен күресудің бір тәсілі.
Ал балаларға арналған қамқорлық – «Кәусар-Тараз» қорының ең жүрекке жылы бағыттарының бірі. Қор жыл сайын екі рет Қ.Сармолдаев атындағы балалар үйіне және оңалту орталықтарына барып, тәттілер, балмұздақ, ойыншықтар мен басқа да қуаныш сыйлайтын тартуларды жеткізіп тұрады. Бұл – қамқорлықтың кәдімгі көрінісінен бөлек, балалық шақтың шаттығын арттыруға бағытталған маңызды әрекет.
Сондай-ақ қор тұрмысы төмен отбасыларға киім-кешек пен аяқ киім түрінде көмек көрсетіп, күнделікті өмірге қажетті тұрмыстық қажеттіліктерді де назардан тыс қалдырмайды.
«Кәусар-Тараз» қоғамдық қорының қызметі – мейірімділік пен жанашырлықтың жарқын үлгісі. Бұл ұйым материалдық қолдаумен қатар, адамға деген сенім мен үмітті де оята алатынын дәлелдеп келеді. Алдағы уақытта да қор өз жұмысын кеңейтіп, Жамбыл жұртына жақсылықтың дәнін себуді жалғастырмақ.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық тапсырыс негізінде жарияланды.
