Өңірде «Заң мен тәртіп» қағидаты аясында және «Таза Қазақстан» экологиялық акциясымен үндескен ауқымды профилактикалық шаралар ұйымдастырылуда.
Бұл жұмыстарға полиция қызметкерлерімен қатар қалалық «Жастар орталығының» еріктілері мен белсенді азаматтар да белсене атсалысуда. Олар қала көшелері мен нысандардың қабырғаларына салынған, есірткі сатылатын интернет-ресурстар мен телеграм-арналардың сілтемелерін көрсететін заңсыз граффити жазуларын бояп, жою жұмыстарын жүргізді.
Облыстық Полиция департаментінің Есірткі қылмысына қарсы іс-қимыл басқармасының мәліметінше, жыл басынан бері өңір аумағында осындай 240 жарнамалық жазу өшірілген.
«Заңсыз граффитилерде негізінен есірткі заттарын онлайн форматта сату арналары көрсетіледі. Мұндай жазулардың көзін дер кезінде жою – жастар арасында есірткінің таралуына жол бермеудің басты шараларының бірі», – дейді басқарманың аға жедел уәкілі Кемеңгер Абдибеков.
Құқық қорғау органдары бұл бағыттағы профилактикалық және түсіндіру жұмыстарының жалғасатынын мәлімдеді.
