Кездесудің басты мақсаты – тұрғындардың жалпы діни сауаттылығын арттыру, діни ағымдардың арбауынан сақтандыру, діни ағымдарды дәстүрлі діндерден қалай ажыратуға болатындығын жан-жақты түсіндіру. Сонымен қатар жас ұрпақты діни экстремизмнің алдын алу барысында атқарылып жатқан жұмыстардан хабардар ету, салт-дәстүрді сақтауға, ұлттық құндылықтарды насихаттауға, отансүйгіштікке, рухани-адамгершілік пен азаматтық-құқықтық ұстанымын қалыптастыруға, бірлік пен бірегейлікке тәрбиелеу.
Дінтанушы, психолог – Нұрлан Байжігітұлы — қоғамдағы теріс ағымдар және қандай жолдармен адамдардың қателесетіні жөнінде ақпараттармен бөлісті. Қазіргі кезде ұялы телефонға, әлеуметтік желіге, яғни ғаламторға шырмалған халықтың, әсіресе жастардың діни сауатсыздығы мен білместігінен заңға қайшы келетін іс әрекеттер белең алатындығы, оның соңы қылмыстық жауапкершілікке апаратындығы туралы да айтып өтті. Сонымен қатар «өнегелі отбасы», «ерінің разылығын алу», «бала тәрбиесі» «шаңырақ берекесін арттыру» жайлы насихат айтып, еркін сұхбат жүргізді. «Алла Тағала Құран Кәрімнің Тахрим сүресінің 6-шы аятында: «Ей иман келтіргендер! Өздеріңді және отбасыларыңды отыны адам мен тастан болған тозақ отынан сақтаңдар. Оның жанындағы періштелер қатал әрі зор. Олар Алланың әміріне бой ұсынғандар, Раббысына қарсы келмейді», — делінген. Осы аяттан түсінгеніміз отбасы құндылығына немқұрайлы қарау, өзіңді және ұрпағыңды отқа тастағаның. Әрбір отбасының егесі әйеліне, бала-шағасына жауапты және жанұясы үшін ертең Алла Тағала алдында амалдары таразыға түсетінін естен шығармағанымыз абзал. Халқымыз үйлену оңай, үй болу қиын деп текке айтпаса керек. Отбасылық өмірдің мәнді де, сәнді болуы ең алдымен тәрбиеге байланысты» — деп отбасыдағы тәрбиені де айтты. Отбасының қадірін білу керектігі және сол сияқты көптеген ақпараттармен бөлісті.
Аллаһ Тағала қасиетті Құранның Бақара сүресінің 187-аятында: «Олар сендер үшін киім, сендер олар үшін киімсіңдер»-деген. Киім адамды сырт көзден, суық пен желден қорғап, адамның кемшілігін жасырып тұратыны белгілі. Ер мен әйелді Аллаһ Тағала бірін-бірі қорғап, кемшіліктерін жасыратын киімге теңеп отыр. Сондай-ақ, Рум сүресінің 21-аятында: «Сендерге олардан тыныштық табуларың үшін өздеріңнен жұбайлар жаратып, араларыңда махаббат пен мейірімділік пайда қылғандығы да Оның белгілерінен. Сөз жоқ, осыларда ойланған ел үшін белгілер бар» — дейді. Аяттан байқағанымыздай ер мен әйел бір-бірі үшін жаратылғандықтан, өз теңін тауып, отбасын құрғанда жандары тыныштық тауып, бақытты ғұмырдың алғы шарттарына қол жеткізеді.
Отбасылық құндылықтар дегеніміз бір-бірін сүйіп қосылған жанұялардың отбасын сақтау үшін қолданатын ежелден келе жатқан салт-дәстүрі. Әрбір отбасының өз құндылықтары болады. Ол құндылықтар ежелден бері келе жатқан немесе жаңадан шығарылған құндылықтар болуы мүмкін. Қазақ халқының ұлттық тәрбиесі әлемде теңдесі жоқ тәрбие. Жалпы «ұлттық» деген сөздің астарында елге-жерге, тілімізге, дінімізге деген құрмет жатыр. Ал осы ұлттық тәрбиені бала бойына сіңіруде бастауыш сыныпта атқарылатын жұмыстың орны ерекше. Яғни тәрбие алуды сәби ана құрсағынан бастаса, оны білім теңізінің мектеп атты кемесінде ұлттық құндылықтарымызбен жетілдіру өте маңызды. Отбасы, балабақша, мектептерге ұлттық тәрбие енгізу арқылы біз ұлтжанды, парасатты ұрпақ өсіретініміз айдан анық. Рухы асқақ, іргесі берік ел боламыз десек, ең бастысы, ұрпақ тәрбиесі мен біліміне сергек қарауымыз қажет. Бұл жөнінде Абай атамыз: «Балаға мінез үш алуан адамнан жұғады: бірінші-ата-анасынан, екіншісі-ұстазынан, үшіншісі-құрбысынан»,-деген екен.
Кездесудің соңында қала мен ауыл тұрғындары өздерінің көкейінде жүрген әртүрлі сұрақтарын қойып, өздеріне керекті мағлұматтарын, рухани әсер алды.
