Облысымызда Ат спортының ұлттық, классикалық және олимпиадалық түрлерінің Федерациясы құрылып, оның Президенті сайланды.
Бүгінгі күні өңірдің ат спорты еліміз бойынша алдыңғы қатарда. Мәселен, «Әулиеата» көкпар клубы еліміздің 8 дүркін жеңімпаздары. Сондай-ақ осы клубтың жанынан құрылған шөген командасы ел біріншілігінде топ жарып үлгерді. Бір айта кететіні, шөген ойыны бізде енді ғана дамып келе жатқан ат спортының бірі болып табылады. Сондай-ақ аударыспақ пен қыз қуудан да аймақтың алыптары қарсыластарын алып та, шалып та жығып жүр десек артық айтқандық емес. Мұндай жетістіктердің барлығы қаржылық қолдаудың арқасында келетіні жасырын емес. Сонымен қатар бәйгеден де жүйріктеріміз өзге өңірдің қыл құйрықтарын талай бәсекеде шаң қаптырып кетіп жүр. Дегенмен, ат спортының ішінде бәйге жарысының мемлекет тарапынан қаржыландыруы осы уақытқа дейін дұрыс жолға қойылмай келген еді. Ал қаржылай көмек алу үшін қоғамдық бірлестік ретінде құрылып, арнайы ережең болуы шарт. Осы олқылықтың орнын толтыру үшін жаңа федерация құрылды.
Жамбыл облысы әкімдігінің ауылшаруашылығы басқармасының мәжіліс залында аталған Федерацияның құрылтай жиналысы өтті. Басқосуға Тараз қаласы әкімінің орынбасары Мақсат Ахаев, ауыл шаруашылығы басқармасы басшысының орынбасары Еркебұлан Анабеков, «Әулиеата» көкпар клубының басшылары мен аудандардағы бәйге аттарын баптайын атқосшылар қатысты. Онда алғаш болып сөз тізгіндеген Еркебұлан Анабеков облыстағы ат спортын бір шаңырақ астына біріктіру үшін Федерация құру қажеттігі бұрыннан айтылып келе жатқандығымен құрғақ сөз күйінде ғана қалып жүргендігін тілге тиек етті. Ат спортының ішінде бәйгешілердің жұмысы жүйеленбей, мәселелері де көптеп кеткендігінен де хабардар етті. Сондай-ақ жиын барысында Мақсат Ахаев өңірдегі ат бәйгесінің бүгінгі жағдайы және даму жолдарына тоқталды. Ол 2015 жылы елімізде бәйге спортының Ұлттық Қауымдастығы құрылып, өткен жылдың қараша айында спорт ретінде танылғандығын жеткізді. Сонымен қатар өңірде жылқыларды будандастырып, таза қандыларын тіркеуге қою мәселесі жоқтың қасы екендігінен хабардар етті. Бүгінде жылқы малын өсірушілердің қарасы көбейіп келе жатқан облысымызда небары таза қанды 163 бие мен 90 айғыр ғана тіркеуден өтіпті. Сондықтан Мақсат Кеңесханұлы облыста ат мәдениетін қалыптастырып, дамыту қажеттігін алға тартты.
Мұнан соң Ат спортының ұлттық, классикалық және олимпиадалық түрлерінің Федерациясы құрылып, жиынға қатысуышларға оның мақсат-міндеттері түсіндірілді. Және ол Федерацияның Президенті болып бірауыздан Мақсат Ахаев сайланды. Сонымен қатар аталған ұйымға өңірдің барлық ат спорт түрлері кіретін болып шешілді. Федерацияныңбәйге және көкпар бағыттары бойынша ішкі бақылау комиссия мүшелері сайланды. Сондай-ақ өңірде болатын бәйгелерге қазылық ететін тұрақты төрешілер бекітілді. Осы уақытқа дейін төрешілікке ақша бөлінбейтін болса, алдағы уақытта олардың жұмысына қаржы бөлу мәселесі жоспарланды.
Шара барысында Федерацияның су жаңа Президенті Мақсат Ахаев облыс төңірегінде болатын бәйгелерге автокөлік тігу мәселесін көтеріп, оны мүлде алып тастауды ұсынды. Оның ұсынысын бірауыздан қолдау тауып, тек қаржылай жүлде берілетін болып шешілді. Сондай-ақ ол республика бойынша қабылданған Ат бәйгесі жарыстарының ережесін таныстырды. Енді, алдағы уақытта әр қашықтық бойынша шауып жүргендер тек бір ереже бойынша шабатын болады. Тіпті, ас беретіндер де Федерация немесе жергілікті атқарушы орган өкілдерімен ақылдасып барып бәйге бермек. Өйткені, ереже бәріне ортақ. Сонымен қатар жиынға қатысушылар қабылданған ережені жергілікте жердегі мәслихаттың шешіміне енгізу туралы ұсыныс айтылып, мақұлданды. Және алдағы күзде облыстық «Әулиеата арғымағы» атты 41 шақырымдық бәйге ұйымдастыру жоспарланды.
Шынболат СЕЙДУАЛИЕВ
