Іріктеу бірнеше кезеңнен тұрады: құжаттарды қабылдау, заңнаманы білуге арналған тестілеу, құзыреттерді бағалау, әңгімелесу және қорытынды шешім шығару. Барлық үдерістер «eQyzmet.gov.kz» сыртқы интернет-порталы арқылы онлайн форматта жүзеге асырылады.
Жаңа формат үміткерлерге белгіленген уақытта және әлемнің кез келген нүктесінен конкурсқа қатысуға мүмкіндік береді. Бұл жүйе ашықтықты, әділдікті және тең қолжетімділікті қамтамасыз етуге бағытталған.
Іріктеу және конкурс өткізудің негізгі кезеңдері:
-
Жүйеде конкурс туралы хабарландыру жариялау;
-
Конкурсқа қатысуға ниет білдірген азаматтардың өтінімдерін қабылдау;
-
Үміткерлердің жеке қасиеттерін, мәтіндік және сандық ақпаратпен жұмыс істеу қабілетін бағалау;
-
Эссе жазу (жекелеген лауазымдар үшін немесе мемлекеттік органның шешімі бойынша);
-
Мемлекеттік органның конкурстық комиссиясында әңгімелесу немесе төменгі лауазымдарға практикалық бағалау өткізу;
-
Конкурс қорытындысын шығару.
Жамбыл облысының жергілікті атқарушы органдарында 2025 жылғы 1 қаңтардан бастап ықпалдастырылған ақпараттық жүйе арқылы «Б» корпусының мемлекеттік әкімшілік лауазымдарына іріктеу және конкурс өткізудің уақытша тәртібі енгізілді.
2025 жылдың қорытындысы бойынша облыстың жергілікті атқарушы органдары 695 бос лауазымға жалпы конкурс жариялады. Оған 2965 үміткер қатысқан. Бұл бір орынға орта есеппен 4,3 адамнан келгенін көрсетеді.
Өткізілген конкурстар нәтижесінде 318 үміткер жеңімпаз атанып, мемлекеттік қызметке қабылданды.
Цифрлық форматтағы іріктеу жүйесі мемлекеттік қызметке қабылдау үдерісін барынша ашық, тиімді және қолжетімді етуге мүмкіндік беруде.
