Қазақстан Республикасы Президентінің Жарлығымен бекітілген Қазақстан Республикасында мемлекеттік басқаруды дамытудың 2030 жылға дейінгі тұжырымдамасында тиімді, әділ, ашық әрі қоғам сұранысына жедел жауап беретін, «халық үніне құлақ асатын мемлекет» қағидаты негізінде жұмыс істейтін мемлекеттік аппарат қалыптастыру міндеті айқындалған.
Қоғам мен мемлекет арасындағы өзара байланыс көбінесе мемлекеттік қызметтерді алу барысында жүзеге асады. Мемлекеттік қызмет көрсету жүйесі азаматтың өмірінің барлық кезеңін қамтиды. Туған сәтінен бастап өмір бойы түрлі қызметтерді алу кезінде азамат мемлекетпен тығыз қарым-қатынаста болады.
Осыған байланысты мемлекеттік көрсетілетін қызметтердің сапасын бақылау, қызмет алушылардың бұзылған құқықтарын, бостандықтары мен заңды мүдделерін қорғау және қалпына келтіру функциялары Қазақстан Республикасы Мемлекеттік қызмет істері агенттігі және оның аумақтық департаменттері арқылы жүзеге асырылады.
Өз кезегінде, Қазақстан Республикасы Мемлекеттік қызмет істері агенттігінің Жамбыл облысы бойынша департаменті өңір көлемінде мемлекеттік қызмет көрсету сапасын бағалау мен бақылау, халыққа қолайлы жағдай жасау, қызмет көрсету рәсімдерін жетілдіру және азаматтардың бұзылған құқықтарын қалпына келтіру бағытында жүйелі жұмыстар атқаруда.
Қазіргі таңда мемлекеттік қызмет алушылардың құқықтарын қорғау мен қалпына келтіруге ерекше назар аударылуда.
2025 жылдың қорытындысы бойынша барлығы 731 қызмет алушының құқықтары қалпына келтірілді. Оның ішінде:
-
жоспарлы тексерулер нәтижесінде – 145;
-
жоспардан тыс тексерулер барысында – 19;
-
сұрау салу арқылы – 19;
-
қашықтықтан бақылау нәтижесінде – 547;
-
«EgovKzBot2.0» Telegram-боты арқылы – 1 азаматтың құқығы қалпына келтірілді.
Анықталған бұзушылықтар бойынша тиісті мемлекеттік органдарға ұсыныстар енгізілді.
Еске сала кетейік, егер Сізге мемлекеттік қызмет көрсетуден негізсіз бас тартылса немесе заңды құқықтарыңыз бұзылса, Қазақстан Республикасы Мемлекеттік қызмет істері агенттігі Жамбыл облысы бойынша департаментіне (Тараз қаласы, Рысбек батыр бұрылысы, 8 «А»), 8 (7262) 43-88-08 нөмірі арқылы, сондай-ақ «08.Onay.qyzmet» Telegram-арнасы арқылы хабарласа аласыз.
Сонымен қатар өтінішті «E-otinish» азаматтардың барлық өтініштерін қабылдау мен өңдеудің бірыңғай платформасы арқылы жолдауға мүмкіндік бар.
