Бүгінгі күні Жамбыл облысы бойынша Тіл саясатын іске асырудың 2020-2025 жылдарға арналған мемлекеттік бағдарламасын іске асыру жөніндегі іс-шаралар жоспары облыс әкімінің 2020 жылғы 6 сәуірдегі №71 қаулысымен бекітілген. Мемлекеттік бағдарламадағы 3 бағыты бойынша облысқа қатысты 3 нысаналы индикатор мен 5 нәтижелі көрсеткішке қол жеткізу көзделген. Белгіленген нысаналы индикатор мен нәтижелі көрсеткіш жыл соңындағы әлеуметтік зерттеу қорытындысы бойынша анықталады. Облыста тіл саясатын жүзеге асыру бағытында басқарма тарапынан жүйелі жұмыстар жүргізілуде. Өңірде тіл мәдениетін көтеру мақсатында жыл басынан түрлі форматта іс-шаралар өткізілуде.
Атап айтқанда, Назарбаев университеті қазақ тілі және түркітану департаментінің ассистент-профессоры, ф.ғ.к. Ағабекова Жазира Ағабекқызымен «Мемлекеттік тілдің қоғамдағы рөлін арттыру мәселелері» тақырыбында, Қазақстан Республикасы Ұлттық ғылым академиясының академигі ф.ғ.д., профессор Шерубай Құрманбайұлымен «Мемлекеттік тіл: сөйлеу мәдениеті және термин мәселелері» тақырыбында онлайн дәрістер, Жамбыл Жабаевтың 175 жылдығына орай, «Жамбыл оқулары», «Мен Жамбылды оқимын» және «Тілге құрмет – елге құрмет» челлендждері, мемлекеттік тілді меңгреген этнос өкілдеріне қолдау көрсету бағытында «Қазақ тілі – ғажап тіл» атты Тіл фестивалі, «Мен қазақша сөйлеймін» акциясы ұйымдастырылды. Сонымен қатар, облыстағы журналистер арасында «Мемлекеттік тіл және БАҚ» облыстық байқауы өткізіп келеді.
Мемлекеттік тілді пайдалануға және үйренуге бағытталған 1 ақпараттық және 1 әлеуметтік бейнеролик әзірленіп, жергілікті телеарналардан көрсетіліп, қазіргі таңда әлеуметтік желілерде таратылуда. Сонымен қатар, ҚР Президенті Қ.Тоқаевтың 2021 жылғы 5 қаңтардағы «Тәуелсіздік бәрінен қымбат» атты мақаласына орай «Ұлы даланың ұлтаралық тілі», «Тілге құрмет – елге құрмет», «Мемлекеттік тілді білу міндет» хештегтерімен өзге ұлт өкілдері арасында инста-челендж жарияланып, 102 адам қатысты.
Сондай-ақ, облыстық тарихи-өлкетану музейі мен Қайрат Рысқұлбеков атындағы саябақта, Талас, Сарысу және Жуалы, Жамбыл аудандарында этнос өкілдерімен «Тіл – достықтың дәнекері» атты кездесу өткізілді. Кездесу аясында мемлекеттік тілді меңгеру арқылы жетістікке жеткен түрлі сала қызметкерлері мен тіл байқаулары жеңімпаздарының, этномәдени бірлестік жетекшілері мен белсенді жастардың, тіл жанашырларының қатысуымен «дөңгелек үстел» отырыстары, байқаулар ұйымдастырылып, жалпы 368 адам қатысты.
Есепті аралықта, Тілдерді оқыту орталығы тыңдаушыларың қатысуымен «Достығымыз жарасқан!», М.Х.Дулати атындағы Тараз өңірлік университеті студенттері арасында «Тіл-достық дәнекері», мектепке дейінгі білім мекемелеріндегі өзге ұлт өкілдері тәрбиеленушілері арасында «Қазақшаң қалай, балақай?» атты байқаулар ұйымдастырылды. Қазақстан Республикасы Тәуелсіздігінің 30 жылдығына орай ұйымдастырылған «Мен қазақша сөйлеймін» республикалық акциясының І және ІІ кезеңі бойынша қатысқан 539 үміткердің ішінде облыстан 15 этнос өкілі жүлделі орындарға ие болды. Бұл әрине өзге ұлт өкілдерінің мемлекеттік тілді меңгерудегі үлкен көрсеткіш.
Материал Жамбыл облысы әкімдігінің ішкі саясат басқармасының тапсырысы бойынша дайындалды
