Жамбыл облысы әкімдігі ішкі саясат басқармасы «Өңірлік коммуникациялар қызметінің» алаңында облыс әкімдігінің денсаулық сақтау басқармасының басшысы Марат Жұманқұлов, «Әлеуметтік медициналық сақтандыру қоры» КЕАҚ Жамбыл облысы бойынша филиалының директоры Мавлюда Боқаеваның қатысуымен баспасөз конференциясы өтті. Спикерлер 2019 жылы кепілдендірілген тегін медициналық көмек шеңберінде көрсетілетін медициналық қызметтерді сатып алу жұмыстарының қорытындысы туралы баяндап, журналистердің сұрақтарына жауап берді.
2019 жылы денсаулық сақтау субъектілерінен мемлекеттік тапсырыс шеңберінде көрсетілетін қызметтерді сатып алу жұмыстарының нәтижесін қорытындыланады. Әлеуметтік Медициналық сақтандыру қоры 2019 жылы халыққа тегін қызмет көрсететін денсаулық сақтау нысандарымен келісімшарт бекітуді аяқтады. Келісімшарт бекіткен емханалар мен клиникалар Кепілдендірілген тегін медициналық көмек пакеті шеңберінде мемлекеттік тапсырысты орындамақ.
Кепілдендірілген тегін медициналық көмек пакетінде қамтылған қызметтерді көрсететін жеткізуші-компанияларды аймақтық комиссия іріктейді. Комиссия құрамында Медициналық сақтандыру қоры, «Атамекен» ұлттық кәсіпкерлер палатасы, пациенттер мен денсаулық сақтау нысандарының мүддесін қорғайтын үкіметтік емес ұйымдардың және Медицина қызметкерлерінің кәсіподағы өкілдері бар.
2019 жылдың басында Әлеуетті жеткізушілер дерекқорына Жамбыл облысы бойынша 118 медицина ұйымы енген болатын. Оның 43-і немесе 36% – мемлекеттік, 75-і немесе 64%-ы – жеке меншік клиникалар. Яғни, мемлекеттік тапсырысты орындауға құлшыныс білдірген жеке меншік клиникалар саны өткен жылмен салыстырғанда 6-ге артып отыр.
Жамбыл облысы бойынша Әлеуметтік Медициналық сақтандыру қоры 2019 жылдың қаңтар айында мемлекеттік тапсырысты алу туралы келісімшарт бекіткен 88 медицина ұйымымен келісімшарт жасасты. Оның 49-ы – жеке меншік клиникалар. Бұл көрсеткіште 2018 жылмен салыстырғанда 2-і мекемеге артқан.
Ал, медициналық көмек көрсететін жеткізуші-ұйымдармен бекітілген келісімшарттың жалпы сомасы 48 млрд 224 млн. теңгені құрады (оның ішінде, мемлекеттік емханалармен – 40,4 млрд теңгенің, жеке меншік клиникалармен – 7,7 млрд теңгенің келісімшарты бекітілді).
Жеке меншік медицина ұйымдары стационарды алмастыратын көмек түрлерін көрсетуге белсенді түрде атсалысып жатыр. Биыл облыс бойынша олардың саны өткен жылмен салыстырғанда 2-ге көбейді. Сонымен қатар, стационарлық көмек, емханалық-амбулаторлық көмек, ауылдық жерлердегі емханалық-амбулаторлық көмек, консультативтік-диагностикалық көмек көрсету бағытында да жеке меншік саланың үлесі басым.
Қазіргі таңда жеке меншік клиникалар көрсететін медициналық көмек түрлері де көбейді. Мәселен, биылғы жылы олар оңалту және қалпына келтіруге бағытталған көмек, стоматологиялық қызмет көрсетуде ерекше белсенділік танытып отыр.
