Мемлекет басшысының мемлекеттік қызметке кірудегі артық кедергілерді жою және жұмысқа орналасу тәртібін жеңілдету жөніндегі тапсырмасына сәйкес Қазақстан Республикасы Мемлекеттік қызмет істері агенттігі бастамасымен «ҚР Мемлекеттік қызметі туралы» Заңға өзгерістер мен толықтырулар енгізілді. Нәтижесінде 2023 жылдан бастап жас мамандар үшін мемлекеттік қызметке орналасу тетігі жеңілдетілді.
Атап айтқанда, мемлекеттік білім беру гранты негізінде жоғары білім алып, оқуын GPA көрсеткіші 3,33-тен төмен емес нәтижемен аяқтаған түлектер диплом алған күннен бастап бір жыл ішінде бірқатар мемлекеттік әкімшілік лауазымдарға конкурссыз орналасу мүмкіндігіне ие болды.
Конкурссыз тағайындалатын лауазымдар:
-
облыс ауданы әкімінің және мәслихат аппаратының төменгі лауазымдары;
-
жергілікті бюджеттен қаржыландырылатын облыс ауданы атқарушы органының басшылық емес лауазымдары;
-
аудандық маңызы бар қала, ауыл, кент, ауылдық округ әкімі аппаратының басшылық емес лауазымдары;
-
орталық мемлекеттік органның және оның ведомствосының аудандық бөлімшелеріндегі басшылық емес лауазымдар.
Конкурссыз тағайындалу шарттары:
-
Білім негізі — мемлекеттік грант бойынша оқу;
-
Үлгерім — GPA 3,33-тен төмен болмауы;
-
Уақыт шектеуі — оқу бітіргеннен кейін 1 жыл ішінде;
-
Қазақстан Республикасы Мемлекеттік қызмет істері агенттігі аумақтық департаментінің келісімі.
Аталған норма білікті жастарды мемлекеттік қызметке тарту, өңірлердегі кадр тапшылығын азайту және жас мамандарды жұмыспен қамту мақсатында енгізілген.
Қазақстанда жастар үшін мемлекеттік қызмет — кәсіби өсуге, тұрақтылыққа және ел дамуына үлес қосуға мүмкіндік беретін маңызды мансаптық бағыт.
Осы мүмкіндікті пайдалана отырып, 2023 жылдан бастап Жамбыл облысы аумағындағы мемлекеттік органдарға 55 жас маман аудандық деңгейдегі басшылық емес лауазымдарға конкурссыз қабылданды.
Атап айтқанда, Қазақстан Республикасы Мемлекеттік қызмет істері агенттігінің Жамбыл облысы бойынша департаменті тарапынан:
-
2023 жылы – 5 түлекке;
-
2024 жылы – 28 түлекке;
-
2025 жылы – 22 түлекке мемлекеттік қызметке қабылдануға келісім берілді.
Бұл бастама жастардың әлеуетін тиімді пайдалануға және мемлекеттік аппараттың сапасын арттыруға бағытталған.
