Отандастарымыздың қасиетті сапарға аман-есен жетіп, құлшылықтарын кедергісіз орындауы үшін отандық 14 туристік фирма қызмет көрсетіп жатыр. Қазақстандық қажылардың қауіпсіздігі мен жайлылығын қамтамасыз ету мақсатында Қазақстан мұсылмандары діни басқармасының үйлестіруімен арнайы Қажылық миссиясы құрылып, қазіргі уақытта күшейтілген режимде, тәулік бойы қызмет етуде.
Қажылық миссиясы сапарға жауапты туристік фирмалардың жұмысын жіті қадағалап, қажылардың жатын орындары мен уақтылы, сапалы тамақтануын бақылауда ұстап отыр. Сонымен қатар, миссия өкілдері қажылықтың ең жауапты кезеңдері — Арафат жазығында тұру, Муздалифада қону, Минада түнеп, шайтанға тас ату және Қағбадағы парыз тауабын орындау сияқты негізгі рәсімдерге жан-жақты дайындық жүргізуде. Әсіресе, қажылықтың ең маңызды шарты өтетін Арафат тауындағы отандастарымыз жайғасатын шатырларды алдын ала белгілеп, орындарды жүйелі түрде бөлу жұмыстары қызу жүріп жатыр. Сапар барысында қажылардың денсаулығын бақылау үшін арнайы білікті дәрігерлер тобы бекітілген, ал құлшылықтардың шариғатқа сай дұрыс орындалуына тәжірибелі уағызшы-теологтар мен дінтанушылар бағыт-бағдар беріп, көмектесуде.
Биылғы қажылық маусымының өзіндік ерекшелігі мен үлкен берекесі — қазақстандық қажылардың арасында жасы жүзден асқан Жұмакүл әжеміздің болуы. Құранды толық жатқа білетін қари әжеміз қасиетті мекенде еліміздің тыныштығы мен бірлігі, халқымыздың амандығы үшін арнайы ақ батасын берді. Бүгінде Қазақстанның қажылық миссиясы барлық ұйымдастыру жұмыстарын бекітілген жоспарға сай үйлестіріп, отандастарымыздың қасиетті сапардағы ғибадаттарының қабыл болуын тілейді.
Айта кететін жайт, үлкен қажылық барысынан арнайы Сауд Арабия Корольдігінің Мекке қаласынан Исламбек Дастан ақпарат таратуда.
