Бірлестік қазақтың дәстүрлі қолөнерін жаңғырта отырып, нәзік жандылардың кәсібін ашуға, табыс табуға, қоғамда өз орнын табуға бағыт-бағдар беруде.
«Шебер Шаңырақ» өз жұмысын мүмкіндігі шектеулі аналар мен әлеуметтік осал топтағы әйелдерді қолөнерге, кәсіпке баулу арқылы жүзеге асырып келеді. Олар жасаған ұлттық нақыштағы бұйымдар — тұрмыстық қолдануға лайықталып, заманауи үлгіде өңделіп, отандық нарыққа шығарылуда. Бұл – әрі табыс көзі, әрі қазақтың ұмыт бола бастаған өнерін қайта тірілтудің нақты жолы.
Ұйым қолөнер шеберлерінің көрмелеріне белсене қатысып, жергілікті және халықаралық деңгейдегі шараларға аналардың қатысуына жағдай жасап келеді. Соның ішінде ерекше атап өтуге болатыны – «Тараз – қолөнершілер қаласы» халықаралық көрмесіне екі жыл қатарынан жүзге жуық ананың қатысуына мүмкіндік тудырғаны. Бұл – көпбалалы, жалғызбасты, мүмкіндігі шектеулі аналар үшін үлкен мотивация, қоғаммен қайта қауышу мүмкіндігі болды.
Ұйым ұйымдастырған «Ұмыт болған оюлар» фестивалі — ұлттық құндылықтарды жаңғыртып, жас буынның рухани тәрбиесіне де үлес қосты. Сонымен қатар, мемлекет басшысының назарына ұсынылған қолөнер көрмесін ұйымдастыру мәртебесіне ие болғаны — ұйымның кәсібилігі мен беделінің дәлелі.
Бүгінде «Шебер Шаңырақ» мүмкіндігі шектеулі аналарға тегін тігін курстарын ұйымдастыруда. Бұл бастама көптеген ананың өміріне жаңа серпін беріп, олардың кәсіби әлеуетін арттыруда. Тек тігін емес, бірлестік орта және шағын кәсіппен айналысқысы келетін әйелдерге бизнес жүргізудің қыр-сырын үйретіп, тәжірибе алмасу мен қолдау алаңына айналған.
Қайырымдылық – ұйым қызметінің ажырамас бөлігі. Түрлі әлеуметтік шараларға қатысып, көмекке мұқтаж жандарға қолдау көрсетіп келеді. Бұл арқылы ұйым қоғамдағы әйел мәртебесін көтеріп, дәстүрлі қазақ қоғамындағы ананың, әйелдің орнын қайта жаңғыртуда.
«Шебер Шаңырақ» — бұл қолөнер мен қайырымдылықты ұштастыра отырып, әйелдердің жаңа өмірге, жаңа табыс көзіне қадам басуына себепші болған нағыз әлеуметтік бастама. Ең бастысы – бұл ұйым нәзік жандыларға сенім сыйлап, олардың қоғамдағы өз орнын табуына көмектесіп келеді.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық тапсырыс негізінде жарияланды.
