Қоғамдық бірлестік өзінің қызметінде жастарға отансүйгіштік пен азаматтық жауапкершілікті сіңіруді, мемлекеттік тілді насихаттауды және ұлттық құндылықтарды ұлықтауды басты бағыт ретінде ұстанып келеді. Ұйым жетекшісі – Талғат Дүкенбайұлы Кеншинбеков.
Бірлестік қызметінің негізгі мақсаты – ел бірлігі мен қоғамдық тұрақтылықты нығайту, әсіресе жастар арасында патриоттық сана мен әскери борышқа деген құрметті арттыру. Бұл мақсатқа жету жолында ұйым сан түрлі тәрбиелік іс-шаралар, танымдық кездесулер мен тарихи-мәдени жобалар ұйымдастырып келеді.
Атап айтқанда, Жамбыл облысының аудан-қалаларында ұйымдастырылған кездесулер мен ашық сұхбат алаңдары барысында жастарға ел тарихындағы елеулі оқиғалар, соның ішінде 1986 жылғы Желтоқсан көтерілісінің мәні мен маңызы терең түсіндіріледі. Желтоқсан оқиғасы — тәуелсіздікке бастар жолдағы шешуші кезеңнің бірі ретінде кеңінен талқыланып, оған қатысушылардың ерлігі мен азаматтық ұстанымы жастардың санасына сіңіріледі. Бұл ретте ұйым өкілдері ел тарихын терең білудің маңызын, ұлт мүддесіне адал болудың жауапкершілігін үнемі алға тартады.
Сонымен қатар, ұйым мемлекеттік тілді дамытуға да айрықша назар аударып отыр. Қазақ тілінің мәртебесін көтеру, оны жастар арасында кеңінен қолдануға ықпал ету бағытында бірқатар әдеби-танымдық шаралар мен байқаулар өткізілуде. Бұл – тіл арқылы ұлттың рухын, ділін, болмысын сақтап қалудың тікелей жолы.
«Желтоқсан ұшқыны» қоғамдық бірлестігінің жұмысы тек патриоттық тәрбие берумен шектелмейді. Олар ұлттық болмыс пен тарихи жадты жаңғыртуды, елдік сана мен ұрпақтар сабақтастығын нығайтуды мақсат тұтады. Ұйым қызметінің ерекшелігі – жастармен тікелей жұмыс жүргізіп, оларды ел мүддесіне бейжай қарамайтын саналы азамат ретінде қалыптастыруға ұмтылуында.
Бүгінде бірлестік Жамбыл өңірінде ғана емес, жалпы республикалық деңгейде де өзекті мәселелерге үн қосып, елдің бірлігі мен тұрақтылығын сақтау жолында үлес қосып келе жатқан маңызды ұйымдардың қатарында. «Желтоқсан ұшқыны» – өткеннің тағылымын ұмытпай, болашаққа бағдар ұстаған азаматтық қоғамның айқын көрінісі.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық тапсырыс негізінде жарияланды.
